पुणे: पुणे गृहनिर्माण आणि क्षेत्रविकास (Pune MHADA) मंडळाने म्हणजेच म्हाडाने विविध योजनांसाठी (Pune News) काढलेल्या सुमारे 4168 घरांच्या सोडतीसाठी यंदा विक्रमी अर्ज आले आहेत. तब्बल 2 लाख 15 हजार 847 नागरिकांनी अर्ज दाखल केले असून हा आजवरचा सर्वात मोठा प्रतिसाद असल्याची माहिती म्हाडाचे मुख्याधिकारी राहुल साकोरे यांनी दिली.
या सोडतीची घोषणा 11 डिसेंबरला करण्याचे नियोजन होते. मात्र, अपेक्षेपेक्षा दुपटीहून अधिक अर्ज आल्याने कागदपत्रांची तपासणी आणि छाननीच्या प्रक्रियेस अधिक वेळ लागणार आहे. त्यामुळे सोडतीची नवी तारीख योग्य वेळी जाहीर करण्यात येईल, असे साकोरे यांनी स्पष्ट केले.
म्हाडाने पुणे, पिंपरी-चिंचवड, सांगली आणि सोलापूर जिल्ह्यांसाठी ही सोडत काढली होती. अर्ज स्वीकृती 11 सप्टेंबरपासून सुरू झाली. सुरुवातीची अंतिम मुदत 31 ऑक्टोबर होती. नागरिकांकडून कागदपत्रे पूर्ण करण्यासाठी वेळ मागितल्याने प्रथम 20 नोव्हेंबरपर्यंत मुदतवाढ देण्यात आली आणि नंतर पुन्हा 10 दिवस वाढवून अंतिम मुदत 30 नोव्हेंबर करण्यात आली.
ऑनलाइन पेमेंटसाठी 30 नोव्हेंबरच्या मध्यरात्रीपर्यंतची मुदत होती, तर बँकेद्वारे RTGS आणि NEFT द्वारे अनामत रक्कम भरण्यासाठी 1 डिसेंबरपर्यंतची तारीख देण्यात आली होती. प्रत्येक अर्जासाठी 708 रुपये शुल्क आणि 20 हजार रुपये अनामत रक्कम निश्चित होती. या सर्व अर्जांमधून मिळून म्हाडाकडे 446 कोटी 97 लाख 59 हजार 676 रुपये जमा झाले आहेत. अर्जांची संख्या मोठी असल्याने तपासणी सुरू असून सोडतीची घोषणा लवकरच करण्यात येणार आहे.
