पुणे: सध्या पुणे महानापालिका (Pune Election) निवडणुकीच्या प्रचाराची (Pune Mahapalika Election) रणधुमाळी जोरात सुरू आहे. यंदाच्या निवडणुकीत पुण्यात अनेक नातेवाईक एकमेकांविरुद्ध किंवा वेगवेगळ्या पक्षांकडून निवडणूक लढवत असल्याचे चित्र पाहायला मिळत आहे. त्यातच प्रभाग क्रमांक 28 जनता वसाहत, हिंगणे खुर्द आणि प्रभाग क्रमांक 27 पर्वती नवी पेठ येथील राजकीय समीकरणे विशेष चर्चेत आहेत. (Latest Marathi News)
या दोन्ही प्रभागांमध्ये नणंद आणि भावजई अशी नातेवाईकांची जोडी निवडणुकीच्या रिंगणात उतरली आहे. विशेष म्हणजे दोघी वेगवेगळ्या पक्षांच्या आणि वेगवेगळ्या चिन्हांवर निवडणूक लढवत असल्या, तरी प्रचार मात्र एकत्र करत असल्याचे चित्र आहे. त्यामुळे राजकीय वर्तुळात या लढतीची जोरदार चर्चा सुरू आहे.
पुणे महानगरपालिकेच्या निवडणुकीत प्रिया गदादे पाटील या अजित पवार गटाच्या राष्ट्रवादी काँग्रेसकडून तर अक्षदा प्रेमराज गदादे पाटील या शरद पवार गटाकडून निवडणूक लढवत आहेत. प्रिया गदादे पाटील या 2012 पासून पुणे महापालिकेच्या नगरसेविका म्हणून कार्यरत असून, त्यांच्या कारकिर्दीनंतर आता त्यांच्याच कुटुंबातील अक्षदा गदादे पाटील यांनी सक्रिय राजकारणात प्रवेश केला आहे.
याआधी बारामती लोकसभा मतदारसंघ मध्ये कुटुंबांतर्गत राजकीय सामना पाहायला मिळाला होता. त्याच धर्तीवर आता पुणे महापालिका निवडणुकीतही नातेवाईक वेगवेगळ्या पक्षांकडून एकमेकांविरुद्ध उभे ठाकल्याचे चित्र दिसत आहे. केवळ एका पक्षापुरते हे मर्यादित नसून जवळपास सर्वच प्रमुख पक्षांमध्ये अशी उदाहरणे आढळत आहेत.
पुण्यातील महापालिका निवडणुकीत तब्बल 1200 पेक्षा अधिक नातेवाईक जोड्या निवडणूक लढवत असल्याची माहिती आहे. पती-पत्नी, नणंद-भावजई, आई-मुलगा, वडील-मुलगा, भाऊ-भाऊ, मामा-भाचा, सासरा-जावई अशा विविध नात्यांच्या जोड्या वेगवेगळ्या पक्षांकडून रिंगणात उतरल्या आहेत. सहा प्रमुख पक्ष निवडणुकीत असल्याने सक्षम उमेदवारांची कमतरता भासत असून, त्यातूनच नातेवाईकांना उमेदवारी देण्याचा मार्ग स्वीकारल्याची चर्चा आहे.
नातेवाईकांना उमेदवारी देण्याचा हा प्रयोग राजकीयदृष्ट्या कितपत यशस्वी ठरणार, हे निवडणुकीच्या निकालानंतरच स्पष्ट होणार आहे. मात्र सध्या तरी पुणे महापालिका निवडणुकीत कौटुंबिक लढतींमुळे राजकीय वातावरण अधिकच तापले असल्याचे दिसत आहे.
