Pune Devendra Fadanvis: महसूल विभागाच्या विविध सेवा सामान्य नागरिकांपर्यंत पारदर्शक आणि सुलभ पद्धतीने पोहोचवण्यासाठी राज्य सरकारकडून मोठा निर्णय घेण्यात आला आहे. येत्या 1 मे 2026 पर्यंत महसूल विभागाच्या एकूण 1,100 सेवा डिजिटली उपलब्ध करून देण्यात येणार आहेत. या सेवांसाठी नागरिकांना शासकीय कार्यालयात जाण्याची आवश्यकता भासणार नाही, असे आश्वासन मुख्यमंत्री देवेंद्र फडणवीस (Devendra Fadanvis) यांनी दिले.
पुण्यातील श्री गणेश कला क्रीडा रंगमंच येथे ‘ सेवा पंधरवडा ’च्या राज्यस्तरीय उद्घाटन समारंभात ते बोलत होते. प्रधानमंत्री नरेंद्र मोदी यांचा जन्मदिवस ( 17 सप्टेंबर) ते महात्मा गांधी जयंती (2 ऑक्टोबर) या कालावधीत छत्रपती शिवाजी महाराज यांच्या स्मरणार्थ राज्यभर ‘सेवा पंधरवडा’ साजरा केला जात आहे.
काय म्हणाले मुख्यमंत्री? (Pune Devendra Fadanvis)
मुख्यमंत्री फडणवीस म्हणाले की, “सेवा हमी कायद्यानुसार असलेल्या 1,100 सेवांना डिजिटली उपलब्ध करून देण्याचे काम युद्धपातळीवर सुरू आहे. त्यापैकी 44 सेवा अशा आहेत, ज्या सेवा घेण्यासाठी 90 टक्के नागरिक अर्ज करतात. त्यामुळे पुढील 3 महिन्यांत या 44 सेवा पूर्णतः ऑनलाईन होतील.
मुख्यमंत्री फडणवीस यांनी ई-नोंदणी प्रणालीचेही कौतुक करताना सांगितले की, त्यामुळे नागरिकांना नोंदणी प्रक्रियेत होणारा त्रास कमी होईल. त्याचप्रमाणे कार्यालयांमध्येही नोंदणीसाठी आवश्यक सुविधा पुरवल्या जातील.
ते पुढे म्हणाले की, “महसूल विभागात सध्या डिजिटायझेशन, ब्लॉकचेन तंत्रज्ञानाचा वापर सुरू आहे. परंतु या आधुनिक तंत्रज्ञानाचा वापर करताना मानवी चुका होणार नाहीत, याची काळजी घ्यावी. जुनी प्रकरणे लोकअदालतीच्या माध्यमातून निकाली काढण्यावर भर द्यावा.”
मुख्यमंत्र्यांनी स्पष्टपणे सांगितले की, कुठलाही मानवी हस्तक्षेप न ठेवता पारदर्शक आणि डिजिटल पद्धतीने सेवा देण्याचा महसूल विभागाचा उपक्रम नागरिकांच्या दैनंदिन जीवनात सकारात्मक बदल घडवणारा ठरेल.
हेही वाचा: Devendra Fadanvis: एक कोटी महिलांना मिळणार बिनव्याजी कर्ज; मुख्यमंत्री देवेंद्र फडणवीस
