Pune Crime: पुणे : पुण्यात दिवसेंदिवस गुन्हेगारी वाढत चाललेली आहे अशातच पुन्हा घरफोडीची घटना उघडकीस आली आहे. भरवस्तीत असलेल्या एका बंद फ्लॅटचं कुलूप तोडून चोरट्यांनी तब्बल 1 लाख रुपयांच्या रोकडवर डल्ला मारला आहे. या धाडसी चोरीमुळे सहकारनगर परिसरात खळबळ माजली असून नागरिकांमध्ये भीतीचं वातावरण पसरलं आहे.
फिर्यादी संजय सदाशिव दिघे वय 55 हे धनकवडी येथील राजमुद्रा सोसायटीमध्ये कुटुंबासह वास्तव्यास आहेत. 12 जानेवारी रोजी मध्यरात्रीच्या सुमारास ते घराबाहेर गेले होते. हीच संधी साधत अज्ञात चोरट्यांनी त्यांच्या बंद फ्लॅटला लक्ष्य केले. मुख्य दरवाजाचे कुलूप तोडून चोरट्यांनी घरात प्रवेश केला. घराची पाहणी करताना ते थेट बेडरूममध्ये गेले.
दिघे यांनी बेडरूममधील कपाटाच्या वरच्या मोकळ्या जागेत एका पिशवीत 1 लाख रुपयांची रोख रक्कम ठेवली होती. चोरट्यांनी कपाट उघडून तपासणी केली असता त्यांना ही पिशवी सापडली. पिशवी उघडताच त्यामधील पैसे पाहून चोरट्यांनी ती पिशवी उचलली आणि घटनास्थळावरून पसार झाले. घरात इतर कोणत्याही वस्तूंची चोरी झाल्याचे प्राथमिक तपासात आढळून आलेले नाही.
दिघे घरी परतल्यानंतर त्यांना मुख्य दरवाजाचे कुलूप तुटलेले दिसले. घरात प्रवेश केल्यानंतर कपाट उघडे असून पैसे गायब असल्याचे लक्षात आले. त्यानंतर त्यांनी तातडीने सहकारनगर पोलीस ठाण्यात धाव घेत तक्रार दाखल केली. पोलिसांनी घटनास्थळाचा पंचनामा केला असून परिसरातील सीसीटीव्ही फुटेज तपासण्याचे काम सुरू आहे.
सोसायटीमध्ये सुरक्षा रक्षक असतानाही चोरट्यांनी घरफोडी केल्यामुळे रहिवाशांमध्ये चिंता व्यक्त केली जात आहे. निवडणुकीच्या पार्श्वभूमीवर पोलीस गस्त वाढवण्यात आली असतानाही अशा घटना घडत असल्याने नागरिकांच्या सुरक्षिततेचा प्रश्न ऐरणीवर आला आहे. पोलीस सध्या परिसरातील सराईत गुन्हेगारांची चौकशी करत असून चोरट्यांचा शोध घेण्याचे काम सुरू आहे.
