पुणे: लहानपणापासून (Pune Crime) मानसिकदृष्ट्या आजारी असलेल्या (Pune News) एका तरुणीच्या असहाय्यतेचा गैरफायदा घेत नातेवाईक असलेल्या तरुणाने तिच्यावर वारंवार लैंगिक अत्याचार केल्याचा गंभीर प्रकार समोर आला आहे. तिला मारून टाकण्याची धमकी देत हा प्रकार लपवून ठेवण्यात आल्याचेही तक्रारीत नमूद करण्यात आले आहे. या प्रकरणी खडकी पोलिसांनी संबंधित आरोपीला अटक केली आहे. (Breaking News)
अफराज जाफर शेख (वय 20, रा. दर्गा वसाहत, खडकी) असे अटक करण्यात आलेल्या आरोपीचे नाव आहे. याप्रकरणी पीडित तरुणीच्या 68 वर्षांच्या आईने खडकी पोलीस ठाण्यात फिर्याद दिली आहे. हा प्रकार मार्च 2025 ते नोव्हेंबर 2025 या कालावधीत वेळोवेळी घडल्याचे फिर्यादीत नमूद करण्यात आले आहे.
पोलिसांनी दिलेल्या माहितीनुसार, फिर्यादी यांची मुलगी लहानपणापासून मानसिक आजाराने ग्रस्त आहे. सध्या तिचे वय 39 वर्षे आहे. ती मनोरुग्ण असल्याची पूर्ण माहिती असतानाही आरोपी अफराज शेख याने तिच्या आजारपणाचा गैरफायदा घेतला. आरोपी तिच्या जवळच्या नातेवाईकाचा मुलगा असल्याने आणि वयाने तिच्यापेक्षा खूप लहान असल्यामुळे कुटुंबातील कोणालाही त्याच्यावर संशय आला नाही.
पीडित तरुणीकडून घेतलेले पैसे परत देण्याचा बहाणा करून आरोपी वारंवार तिच्या घरी येत असे. मार्च 2025 मध्ये त्याने तिच्याशी जबरदस्तीने शारीरिक संबंध ठेवले. हा प्रकार कुणालाही सांगितल्यास तुला मारून टाकीन, अशी धमकी देत त्याने पुढील काळातही तिच्यावर वारंवार अत्याचार केल्याचे तक्रारीत म्हटले आहे.
या घटनेची भीती आणि दबावामुळे तरुणीने दीर्घकाळ हा प्रकार कुणालाही सांगितला नाही. मात्र काही दिवसांपूर्वी तिने धैर्य एकवटून हा प्रकार आपल्या आईला सांगितला. त्यानंतर आईने तात्काळ खडकी पोलीस ठाण्यात धाव घेऊन तक्रार दाखल केली.
पोलिसांनी आरोपीविरोधात गंभीर स्वरूपाचे गुन्हे दाखल करून त्याला अटक केली आहे. या प्रकरणाचा पुढील तपास सहायक पोलीस निरीक्षक पटेल करत आहेत.
