पुणे: पुणे शहरात (Pune Crime) चोरीच्या घटनांमध्ये दिवसेंदिवस वाढ होताना दिसत आहे. सार्वजनिक ठिकाणी, रिक्षातून प्रवास करताना किंवा पहाटेच्या वेळी एकटे असताना (Breaking News) नागरिकांना लक्ष्य केले जात असल्याचे प्रकार सातत्याने समोर येत आहेत. अशातच चोरीच्या दोन वेगवेगळ्या घटनांनी पुन्हा एकदा नागरिकांच्या सुरक्षेचा प्रश्न ऐरणीवर आला आहे. (Latest Marathi News)
गर्दीचा फायदा घेत दागिने लंपास
पहिली घटना बारामती येथील 55 वर्षीय महिलेबाबत घडली आहे. ही महिला 17 डिसेंबर रोजी आपल्या पतीसोबत वैयक्तिक कामासाठी पुण्यात आली होती. संध्याकाळी साडेसातच्या सुमारास त्यांनी शिवाजीनगर येथून स्वारगेट एसटी स्थानकाकडे जाण्यासाठी रिक्षा पकडली. प्रवासादरम्यान आपल्याकडील मौल्यवान दागिने सुरक्षित राहावेत, यासाठी महिलेने सोन्याचे दागिने एका डब्यात ठेवून ते पिशवीच्या आत ठेवले होते. मात्र स्वारगेट स्थानकावर पोहोचल्यानंतर दागिने गायब असल्याचे त्यांच्या लक्षात आले. सुमारे 3 लाख 78 हजार रुपये किमतीचे सोन्याचे दागिने चोरीला गेल्याचे समोर आले आहे. याप्रकरणी संबंधित महिलेने स्वारगेट पोलीस ठाणे येथे तक्रार दाखल केली आहे. गर्दीचा फायदा घेत अज्ञात चोरट्यांनी ही चोरी केल्याची शक्यता पोलिसांकडून वर्तवण्यात येत आहे.
सोनसाखळी हिसकावली
दुसरी घटना कात्रज-आंबेगाव परिसरात घडली आहे. या भागात मॉर्निंग वॉकसाठी बाहेर पडणारे किंवा बसची वाट पाहणारे नागरिक चोरट्यांचे लक्ष्य बनत असल्याचे चित्र आहे. 24 नोव्हेंबर रोजी पहाटे साडेपाचच्या सुमारास एक ज्येष्ठ नागरिक जांभुळवाडी रोडवर एसटी बसची वाट पाहत उभे होते. परिसरात अंधार असल्याचा फायदा घेत दुचाकीवरून आलेल्या दोन अज्ञात भामट्यांनी त्यांच्या गळ्यातील सुमारे 60 हजार रुपये किमतीची सोनसाखळी जोरात हिसकावून नेली. या घटनेनंतर नागरिकांमध्ये भीतीचे वातावरण पसरले आहे. याप्रकरणी आंबेगाव पोलीस ठाणे येथे अज्ञात दुचाकीस्वारांविरोधात गुन्हा दाखल करण्यात आला असून परिसरातील सीसीटीव्ही फुटेज तपासले जात आहे.
