Pune Crime: पिंपरी-चिंचवड : पिंपरी-चिंचवड शहरातून माणुसकीला काळीमा फासणारी एक संतापजनक घटना समोर आली आहे. लग्नाला अवघा एक महिना होत नाही तोच हुंड्यासाठी विवाहितेचा अमानुष छळ (Dowry Case) करण्यात आल्याचा प्रकार उघडकीस आला आहे. शेअर मार्केटमधील (Share Market) तोटा भरून काढण्यासाठी सासरच्या मंडळींनी या महिलेकडे पैशांची मागणी करत तिला शारीरिक आणि मानसिक त्रास दिला. या प्रकरणामुळे परिसरात संताप व्यक्त केला जात आहे.
पीडित महिलेचा विवाह 24 नोव्हेंबर 2024 रोजी झाला होता. लग्नानंतर काही दिवसांतच तिचा संसार त्रासदायक ठरू लागला. पती राजदीप, सासरे प्रदीप आणि सासू हेमलता यांनी किरकोळ कारणांवरून तिला टोमणे मारणे, शिवीगाळ करणे आणि मारहाण करण्यास सुरुवात केली. तिला अनेकदा उपाशी ठेवण्यात आल्याचा आरोपही तक्रारीत करण्यात आला आहे. या वागणुकीमुळे तिचे मानसिक खच्चीकरण झाले होते.
सासरच्या मंडळींना शेअर मार्केटमध्ये मोठा आर्थिक तोटा झाला होता. हा तोटा भरून काढण्यासाठी त्यांनी पीडितेच्या वडिलांकडे 5 लाख रुपयांची मागणी केली. छळ सहन न झाल्याने पीडितेने वडिलांकडून 3 लाख रुपये आणून सासरच्यांना दिले. मात्र, एवढ्यावरही त्यांचे समाधान झाले नाही. दिवाळीच्या काळात पुन्हा पैशांची मागणी करत तिला माहेरी पाठवण्यात आले.
21 डिसेंबर 2025 रोजी पीडिता पुन्हा सासरी आली असता, पैसे आणले असतील तरच घरात ये, अशी धमकी देत तिला घरात प्रवेश नाकारण्यात आला. यावेळी झालेल्या वादात सासऱ्याने तिला बेल्टने बेदम मारहाण केली, तर पतीने लाथाबुक्क्यांनी मारहाण केली. सासूनेही या मारहाणीत साथ दिल्याचे तक्रारीत नमूद आहे.
या हल्ल्यात पीडितेच्या शरीरावर गंभीर जखमा झाल्या असून तिच्यावर सध्या रुग्णालयात उपचार सुरू आहेत. या प्रकरणी दापोडी पोलीस ठाण्यात सासरच्या तिघांविरुद्ध गुन्हा दाखल करण्यात आला आहे. पोलिसांकडून पुढील तपास सुरू असून, अशा घटनांवर कठोर कारवाईची मागणी नागरिकांकडून केली जात आहे.
