पुणे: वाघोलीतील डोमखेल रोड परिसरात घडलेल्या एका (Pune Crime) कौटुंबिक वादाने हिंसक वळण घेत सासू गंभीर जखमी झाल्याची घटना समोर आली आहे. 18 फेब्रुवारी रोजी दुपारी 4 वाजता हंसराज सुपर मार्केटसमोर हा प्रकार घडला. जावयाने रस्त्यावर पडलेला दगड उचलून सासूच्या डोक्यात मारल्याचा आरोप असून, त्या सध्या ससून रुग्णालयात उपचार घेत आहेत. (Latest Marathi News)
या प्रकरणी आशाबाई माधव हनवते यांनी वाघोली पोलीस ठाण्यात तक्रार दाखल केली आहे. त्यावरून त्यांचे जावई अंकुश रंगराव मंदाडे (वय 28) यांच्याविरुद्ध गुन्हा नोंदवण्यात आला आहे. पोलिसांच्या माहितीनुसार, हनवते यांची मुलगी संध्या हिचा अंकुश याच्याशी 5 वर्षांपूर्वी विवाह झाला होता. दोघांमध्ये काही काळापासून कौटुंबिक मतभेद सुरू होते. त्यामुळे संध्या गेल्या 2 महिन्यांपासून माहेरी राहत होती. विशेष म्हणजे मागील 30 दिवसांपासून अंकुशही तेथेच राहत होता.
घटनेच्या दिवशी अंकुश संध्याला “आईसोबत राहू नकोस, माझ्यासोबत वडजाई रोडवरील घरी चल” असे म्हणत तिच्यावर दबाव टाकत होता. वाद वाढताच त्याने तिच्यावर हात उचलल्याचा आरोप आहे. हे पाहून आशाबाई यांनी मध्ये पडत “ती स्वखुशीने येत असेल तर घेऊन जा, पण मारहाण करू नका” असे सांगितले. यानंतर संतापाच्या भरात अंकुशने “तुझ्यामुळे आमचा संसार तुटला, मध्ये बोलू नकोस” असे म्हणत दगड उचलून त्यांच्या उजव्या कानाजवळ मारला. पोलिसांकडून पुढील तपास सुरू असून, या घटनेने परिसरात खळबळ उडाली आहे.
