अमित मुंडीक
पुणे: पुणे शहरातील लक्ष्मीनगर पोलिस (Pune Crime) स्टेशन हद्दीत एमडी विक्री करणाऱ्या एका इसमावर पोलिसांनी सापळा रचून यशस्वी कारवाई केली आहे. दिनांक ०४/०१/२०२६ रोजी अवैध धंद्यांविरोधात कारवाई करण्याबाबत मा. पोलीस उपआयुक्त परिमंडळ-४ श्री. चिलुमुला रजनिकांत व मा. सहा पोलीस आयुक्त येरवडा विभाग श्री. सुनिल जैतापुरकर यांनी दिलेल्या सूचनांनुसार ही कारवाई करण्यात आली. (Latest Marathi News)
वरिष्ठ पोलीस निरीक्षक श्री. रविंद्र कदम यांच्या मार्गदर्शनाखाली पोलिस अंमलदार कांबळे यांना गुप्त बातमीदारामार्फत माहिती मिळाली की, सर्व्हे नं. १०, गवळीवाडा, दरगावाडी, येरवडा परिसरात एक इसम एमडी विक्रीसाठी येणार आहे. मिळालेल्या माहितीनुसार पोलिस पथकाने घटनास्थळी गुप्त सापळा रचून एका इसमाला ताब्यात घेतले.
ताब्यात घेतलेल्या इसमाने आपले नाव नायाब अफाक शेख (वय २३), रा. मंगळवार पेठ, पुणे असे सांगितले. त्याची अंगझडती घेतली असता त्याच्याकडे ०२ ग्रॅम ०२ मिलीग्रॅम एमडी (किंमत अंदाजे ४० हजार रुपये) आढळून आली. सदर मुद्देमाल जप्त करण्यात आला असून लक्ष्मीनगर पोलिस स्टेशन गुन्हा रजिस्टर नं. १०/२०२६ अन्वये एनडीपीएस अॅक्ट कलम ८(क), २१(क), २१(अ), २९ प्रमाणे गुन्हा दाखल करण्यात आला आहे.
ही कारवाई मा. अप्पर पोलीस आयुक्त पूर्व प्रादेशिक विभाग श्री. मनोज पाटील यांच्या मार्गदर्शनाखाली पार पडली. सदर कारवाईत वरिष्ठ पोलीस निरीक्षक श्री. रविंद्र कदम यांच्यासह सपोनि रविकांत नंदनवार, मिथुन सावंत, शिवाजीराव विभुते तसेच कांबळे, शिंदे, जाधव, गायकवाड, वायाळ, चव्हाण, गद्दे आदी पोलिस कर्मचाऱ्यांनी सहभाग घेतला.
