प्रतिनिधी अमित मुंडीक
Pune Crime : पुणे : शहरातील गुन्हे शाखेच्या युनिट 3 ने खुनाच्या प्रयत्नासारख्या गंभीर गुन्ह्यातील रेकॉर्डवरील आरोपीला तीन गावठी पिस्टल आणि 12 जिवंत काडतुसेसह जेरबंद केले. 18 फेब्रुवारी 2026 रोजी आगामी शिवजयंती उत्सवाच्या पार्श्वभूमीवर सिंहगड रोड व नांदेड सिटी पोलीस ठाण्याच्या हद्दीत पेट्रोलिंग सुरू असताना गोपनीय माहितीच्या आधारे ही कारवाई करण्यात आली.
मिळालेल्या माहितीनुसार सागर दत्तात्रय सोनलकर (वय 25, रा. धायरी, पुणे) हा प्रयेजा सिटी, वडगाव बु. येथे अवैधरित्या अग्निशस्त्रे बाळगत असल्याचे समोर आले. पोलिसांनी सापळा रचून शिताफीने त्याला ताब्यात घेतले आणि त्याच्याकडून तीन गावठी पिस्टल व 12 जिवंत काडतुसे जप्त केली. पुढील कायदेशीर कारवाईसाठी आरोपीला संबंधित पोलीस ठाण्याच्या ताब्यात देण्यात आले आहे.
ही कारवाई अपर पोलीस आयुक्त पंकज देशमुख, पोलीस उपआयुक्त निखिल पिंगळे व सहायक पोलीस आयुक्त शंकर खटके यांच्या मार्गदर्शनाखाली पार पडली. पोलीस निरीक्षक प्रशांत अन्नछत्रे यांच्या सूचनेनुसार सहायक पोलीस निरीक्षक ज्ञानेश्वर ढवळे, उपनिरीक्षक पंढरीनाथ शिंदे आणि त्यांच्या पथकाने ही धाडसी कामगिरी बजावली.
