Pune Crime: पुणे: मोशी परिसरात आलिशान मर्सिडीज कारमधून बेकायदेशीररीत्या दारूची वाहतूक करणाऱ्या एका वाहतूक व्यावसायिकावर पिंपरी-चिंचवड पोलिसांनी कारवाई केली आहे. ही कारवाई रविवारी दुपारी एमआयडीसी भोसरी पोलिस ठाण्याच्या हद्दीतील बोऱ्हाडेवाडी येथे करण्यात आली. आरोपीला दारू आणि रोख रक्कम घेऊन जात असताना रंगेहाथ पकडण्यात आले.
हेही वाचा- पुण्यात राष्ट्रवादीचेच ‘आमनेसामने’; जोशी-शितोळे संघर्षाने हायव्होल्टेज ड्रामा!
या प्रकरणी पोलिस कॉन्स्टेबल संदीप आश्रुबा सौदागर यांनी एमआयडीसी भोसरी पोलिस ठाण्यात तक्रार दाखल केली आहे. पोलिसांनी सागर सुभाष बोराटे (वय 38, रा. बोऱ्हाडेवाडी, मोशी) याला ताब्यात घेतले आहे. पोलिसांनी दिलेल्या माहितीनुसार, आरोपी MH 14 JL 4737 क्रमांकाच्या मर्सिडीज-बेंझ कारमधून परवाना नसलेली दारू वाहतूक करत होता. कारवाईदरम्यान 4,170 रुपये किमतीची दारू, 50,000 रुपये रोख रक्कम आणि सुमारे 26 लाख रुपये किमतीची मर्सिडीज कार जप्त करण्यात आली आहे. या प्रकरणाचा पुढील तपास एमआयडीसी भोसरी पोलिस करत आहेत.
दरम्यान, बेकायदेशीर दारू वाहतुकीची आणखी एक घटना पिंपरी परिसरात उघडकीस आली आहे. पिंपरीतील यशवंतराव चव्हाण रोडवर विनापरवाना देशी दारूची वाहतूक करणाऱ्या एका हॉटेलचालकाला पोलिसांनी अटक केली आहे. शनिवारी रात्री हाफकिन कंपनीच्या मागील सुरक्षा भिंतीजवळ ही कारवाई करण्यात आली.
या प्रकरणी पोलिस कॉन्स्टेबल भागवत अंकुश गायकवाड यांनी संत तुकाराम नगर पोलिस ठाण्यात तक्रार दाखल केली आहे. पोलिसांनी ज्ञानेश्वर तानाजी शिंदे (वय 41, रा. भोसरी) याला ताब्यात घेतले आहे. आरोपी MH 14 KM 5563 क्रमांकाच्या अॅक्टिवा स्कूटरवरून देशी दारूच्या 298 सीलबंद बाटल्या विक्रीसाठी घेऊन जात होता. पोलिसांनी 11,920 रुपये किमतीची दारू आणि दुचाकी जप्त केली असून एकूण 71,920 रुपये किमतीची मालमत्ता जप्त करण्यात आली आहे. आरोपीला नोटीस बजावण्यात आली असून संत तुकाराम नगर पोलिस या प्रकरणाचा तपास करत आहेत.
