Pune Crime: पुणे : एखाद्या दाक्षिणात्य चित्रपटाच्या कथेलाही लाजवेल असा थरार गेल्या ४८ तासांपासून पुणे जिल्ह्यात पाहायला मिळाला. ज्या चोरट्यांना पकडण्यासाठी पोलिसांनी आपलं जीव झोकून दिला आहे. त्यांनी पोलिसांना चकवा देण्यासाठी कडाक्याच्या थंडीत नदीत उड्या मारल्या.
खडकवासला ते पानशेत रस्त्यावरील खानापूर परिसरात असलेल्या ‘वैष्णवी ज्वेलर्स’ या सराफी दुकानावर झालेल्या धाडसी दरोड्याचा पुणे ग्रामीण पोलिसांनी अवघ्या 48 तासांत छडा लावला आहे. या प्रकरणात पोलिसांनी फिल्मी स्टाईलने कारवाई करत नदीत उडी मारून एका दरोडेखोराला पकडले. त्याच्यासह इतर साथीदारांनाही ताब्यात घेण्यात आले असून या कारवाईचे सर्वत्र कौतुक होत आहे.
या दरोड्यात आरोपींनी सराफी दुकानातून सुमारे 84 तोळे सोने आणि रोख रक्कम असा एकूण 1 कोटी 5 हजार रुपयांचा मुद्देमाल लुटला होता. पोलीस अधीक्षक संदीपसिंग गिल्ल यांनी पत्रकार परिषदेत दिलेल्या माहितीनुसार, या प्रकरणात अंकुश दगडू कचरे आणि गणेश भांबु कचरे या दोन मुख्य आरोपींसह त्यांच्या तीन अल्पवयीन साथीदारांना ताब्यात घेण्यात आले आहे.
वैष्णवी ज्वेलर्समध्ये दरोडा
26 डिसेंबर रोजी दुपारी कोयते आणि तलवारीचा धाक दाखवून आरोपींनी वैष्णवी ज्वेलर्समध्ये दरोडा टाकला होता. घटनेनंतर स्थानिक गुन्हे शाखा आणि हवेली पोलीस ठाण्याची सहा विशेष पथके तपासासाठी तैनात करण्यात आली. सीसीटीव्ही फुटेज आणि तांत्रिक विश्लेषणाच्या मदतीने आरोपींची ओळख पटली. तपासात आरोपी वेल्हे तालुक्याच्या दिशेने पळून गेल्याचे निष्पन्न झाले.
पोलिसांनी दोन रात्री आरोपींचा पाठलाग केला. एका डोंगराळ भागात पोलिसांना पाहून दरोडेखोरांनी पळ काढण्याचा प्रयत्न केला. समोर नदी आल्याने त्यांनी दुचाकी सोडून पाण्यात उड्या घेतल्या. या वेळी पोलीस अंमलदार गणेश धनवे आणि सागर नामदास यांनीही कोणतीही भीती न बाळगता नदीत उडी मारली. गणेश धनवे यांनी वेगाने पोहत नदीचा पलीकडचा तीर गाठला आणि आरोपी अंकुश कचरे बाहेर येताच त्याला अटक करण्यात आली.
अटकेत असलेला अंकुश कचरे हा सराईत गुन्हेगार असून त्याच्यावर यापूर्वीही तीन गुन्हे दाखल आहेत. तपासात या टोळीने कात्रज येथून खानापूर येथे येऊन दोन ते तीन वेळा दुकानाची रेकी केल्याचे समोर आले आहे. दुकानातील गर्दी कमी असते, अशी दुपारची वेळ त्यांनी दरोड्यासाठी निवडली होती. पोलिसांनी या कारवाईत 70 लाख 32 हजार रुपयांचे सोने, गुन्ह्यात वापरलेली दुचाकी आणि शस्त्रे जप्त केली आहेत. वरिष्ठ पोलीस निरीक्षक अविनाश शिळीमकर आणि वैशाली पाटील यांच्या मार्गदर्शनाखाली ही कारवाई यशस्वी झाली असून आरोपींच्या इतर गुन्ह्यांचा तपास सुरू आहे.
