पुणे: रेल्वेमध्ये अधिकारी (Pune Crime) असल्याचा बहाणा करून रेल्वेत नोकरी लावण्याचे (Pune News) आमिष दाखवत एका सराईत चोरट्याने महिलेची 6 लाख 96 हजार रुपयांची फसवणूक केल्याचा प्रकार उघडकीस आला आहे. या प्रकरणी धनकवडी येथील 47 वर्षांच्या महिलेने सहकारनगर पोलीस ठाण्यात तक्रार दाखल केली असून पोलिसांनी आरोपीविरोधात गुन्हा नोंदवला आहे. (Latest Marathi News)
ओळखीचा गैरफायदा
प्राधान्य श्यामलाल तारलेजा (वय 35, रा. फ्लेमिंगो सोसायटी, छत्रपती संभाजीनगर, मूळ रा. तलरेजानगर, जालना) असे आरोपीचे नाव आहे. पोलिसांनी दिलेल्या माहितीनुसार, फिर्यादी महिला धनकवडी परिसरात राहतात. आरोपीची त्यांच्याशी 2018 साली ओळख झाली होती. त्या ओळखीचा गैरफायदा घेत आरोपीने स्वतःला रेल्वेमधील अधिकारी असल्याचे सांगितले आणि महिलेच्या पतीला रेल्वेत नोकरी लावण्याचे आमिष दाखवले.
लाखोंचा गंडा
नोकरी लावण्यासाठी विविध कारणे सांगत आरोपीने वेळोवेळी महिले कडून एकूण 6 लाख 96 हजार रुपये उकळले. सुरुवातीला आरोपीने लवकरच नियुक्ती होईल, कागदपत्रांची प्रक्रिया सुरू आहे, वैद्यकीय तपासणी आणि ट्रेनिंगबाबतही माहिती दिली जाईल, असे सांगून महिलेला विश्वासात घेतले. मात्र बराच कालावधी उलटूनही नोकरी मिळाली नाही. महिलेने वारंवार विचारणा केल्यानंतर आरोपी टाळाटाळ करू लागला.
तक्रार दाखल
यामुळे आपली फसवणूक झाल्याचे लक्षात येताच महिलेने सहकारनगर पोलीस ठाण्यात तक्रार दाखल केली. तपासादरम्यान आरोपीचा गुन्हेगारी इतिहासही समोर आला आहे. दोन वर्षांपूर्वी, 2023 साली एमआयडीसी भोसरी पोलीस ठाण्यात त्याच्याविरोधात अशाच प्रकारची फसवणुकीची तक्रार दाखल होती. त्या प्रकरणात आरोपीने एका महिलेच्या मदतीने चौघांना रेल्वेत नोकरी लावण्याच्या बहाण्याने 11 लाख 77 हजार रुपये घेऊन फसवणूक केल्याचे निष्पन्न झाले होते.
सद्याच्या प्रकरणाचा तपास सहायक पोलीस निरीक्षक जाधव करत असून आरोपीचा शोध आणि पुढील चौकशी सुरू आहे. पोलिसांनी नागरिकांना अशा आमिषांना बळी न पडण्याचे आणि नोकरीच्या नावाखाली पैसे मागणाऱ्यांपासून सावध राहण्याचे आवाहन केले आहे.
