Pune Crime : पुणे : शहरातील महर्षी नगर परिसरात किरकोळ कारणावरून झालेल्या वादातून गंभीर हल्ल्याची घटना समोर आली आहे. हातगाडी लावण्याच्या वादातून दोन जणांवर धारदार शस्त्राने हल्ला करण्यात आल्याने परिसरात खळबळ उडाली आहे. ही घटना स्वारगेट पोलीस ठाण्याच्या हद्दीत घडली.
मिळालेल्या माहितीनुसार, महर्षी नगर परिसरात हातगाडी लावण्याच्या कारणावरून स्थानिक हॉटेल मालक आणि काही तरुणांमध्ये सुरुवातीला वाद झाला. आधी बाचाबाची झाली, मात्र काही वेळातच हा वाद चिघळून मारहाणीत बदलला. संतापाच्या भरात आरोपींनी धारदार शस्त्राने हॉटेल मालक आणि त्याच्या कामगारावर हल्ला केला.
या हल्ल्यात हॉटेल मालक गंभीर जखमी झाला असून त्याचा हात कापण्यात आल्याची माहिती समोर आली आहे. त्याच्यासोबत असलेला कामगारही गंभीर जखमी झाला आहे. जखमींना तातडीने रुग्णालयात दाखल करण्यात आले असून त्यांच्यावर उपचार सुरू आहेत.
या प्रकरणात किशोर राजू बनसोडे आणि प्रसाद यांच्यावर हल्ला झाल्याचे समोर आले आहे. घटनेनंतर आरोपी घटनास्थळावरून फरार झाले असून पोलिसांकडून त्यांचा शोध घेतला जात आहे.
घटनेची माहिती मिळताच स्वारगेट पोलिसांनी घटनास्थळी धाव घेत पंचनामा केला. पोलिसांनी या प्रकरणाची गंभीर दखल घेतली असून पुढील तपास सुरू आहे.
