पुणे: पुढे साहेब लोक आहेत, त्यामुळे तुमच्या (Pune Crime) गळ्यातील सोन्याच्या वस्तू काढून (Pune News) बॅगमध्ये ठेवा, अशी बतावणी करत दोघा भामट्यांनी 72 वर्षांच्या ज्येष्ठ महिलेची फसवणूक केल्याचा प्रकार चंदननगर परिसरात उघडकीस आला आहे. मोफत साडी आणि किराणा माल देण्याचे आमिष दाखवून या भामट्यांनी तब्बल 120000 रुपये किमतीचे सोन्याचे दागिने घेऊन पोबारा केला आहे. या प्रकरणी चंदननगर पोलीस ठाण्यात गुन्हा दाखल करण्यात आला असून पुढील तपास सुरू आहे. (Latest Marathi News)
याबाबत 72 वर्षांच्या एका महिलेने चंदननगर पोलीस ठाण्यात फिर्याद दिली आहे. फिर्यादी या खासगी पीजीमध्ये स्वयंपाकाचे काम करतात. 17 डिसेंबर रोजी सकाळी साडेनऊ वाजण्याच्या सुमारास त्या लक्ष्मी गुंज अपार्टमेंट येथून पायी कामासाठी निघाल्या होत्या. त्याच वेळी वाटेत दोघे अनोळखी इसम त्यांच्या जवळ आले.
त्या दोघांनी चंदननगर परिसरात गरीब लोकांसाठी मोफत साडी आणि किराणा मालाचे वाटप सुरू असल्याचे सांगितले आणि तुम्ही आमच्यासोबत चला, आम्ही तुम्हाला ते मिळवून देतो, असे सांगितले. मात्र, फिर्यादी महिलेने साडी आणि किराणा माल नको असल्याचे स्पष्ट केले. तरीही काही वेळानंतर त्या नेमके काय घडते आहे हे न समजता त्या इसमाच्या मागे चालू लागल्या.
थोडे पुढे गेल्यानंतर त्या भामट्याने पुढे साहेब लोक उभे आहेत, त्यामुळे तुमच्या अंगावरील सोन्याच्या वस्तू काढून बॅगमध्ये ठेवा, असे सांगितले. त्यावर महिलेने कानातील सोन्याचे टॉप्स, वेल तसेच गळ्यातील रामअक्षर आणि मणी काढून बॅगमध्ये ठेवण्यास सुरुवात केली. त्याच वेळी त्या इसमाने मी बॅगेत ठेवतो, असे सांगून ते दागिने तिच्याकडून घेतले.
मात्र, बॅगेत दागिने न ठेवता तो इसम थेट खराडी बायपास रोडच्या दिशेने पळून गेला. काही अंतरावर उभा असलेला त्याचा साथीदारही त्याच्यासोबत पळून गेला. फिर्यादी महिलेने चोर चोर अशी आरडाओरड करत काही अंतर त्यांचा पाठलाग केला, मात्र दोघेही पसार झाले. या प्रकरणाचा पुढील तपास सहायक पोलीस निरीक्षक जगदाळे करत आहेत.
