पुणे: पुणे शहरातील फरासखाना पोलीस (Pune Crime) ठाण्यात दाखल बांगलादेशी नागरिकांच्या बेकायदेशीर वास्तव्य प्रकरणात न्यायालयाने महत्त्वाचा निकाल दिला आहे. जिल्हा न्यायालय व अतिरिक्त सत्र न्यायाधीश मा. श्री. यू. पी. कुलकर्णी यांनी आज या प्रकरणातील सर्व आरोपींना दोषी ठरवले आहे. (Latest Marathi News)
फरासखाना पोलीस स्टेशन, पुणे शहर येथे गुन्हा रजिस्टर क्रमांक 159/2023 अंतर्गत पारपत्र अधिनियम 1950 चे कलम 3 सह 12(1)(c) आणि परकीय कायदा कलम 14(A)(a)(b) अन्वये हा गुन्हा दाखल करण्यात आला होता. या खटल्यात शबिना उर्फ साथी ईकलास मुल्ला व इतर 19 आरोपी, सर्व मूळचे बांगलादेशचे रहिवासी, यांच्यावर खटला चालवण्यात आला.
न्यायालयात सादर करण्यात आलेल्या पुराव्यांनुसार, आरोपींनी कोणतेही वैध पासपोर्ट, व्हिसा किंवा भारत-बांगलादेश सीमेवरील अधिकाऱ्यांची लेखी परवानगी न घेता रात्रीच्या वेळी गस्ती पथकाची नजर चुकवून बेकायदेशीररीत्या भारतात प्रवेश केला होता. त्यानंतर ते पुण्यातील बुधवारपेठ परिसरातील 1031 जुनी सागर बिल्डिंग येथील दुसरा आणि चौथा मजला येथे अनधिकृतपणे राहत असल्याचे तपासात निष्पन्न झाले होते. या प्रकरणात 9/1/2023 रोजी दुपारी 12.15 वाजता पोलिसांनी आरोपींना अटक केली होती.
या खटल्यात सरकार पक्षातर्फे अतिरिक्त सरकारी अभियोक्ता प्रमोद हजारे यांनी काम पाहिले, तर तपास अधिकारी म्हणून फरासखाना पोलीस ठाण्याचे पोलीस निरीक्षक (गुन्हे) मंगेश जगताप यांनी तपास पूर्ण केला.
न्यायालयाने सीआरपीसी 1973 चे कलम 235(2) अन्वये शिक्षा सुनावत सर्व आरोपींना पारपत्र अधिनियम 1950 अंतर्गत 2 वर्षे सक्त मजुरी आणि 500 रुपये दंड, दंड न भरल्यास 10 दिवस सक्त मजुरी अशी शिक्षा ठोठावली. तसेच परकीय कायदा कलम 14(A)(a)(b) अंतर्गत 2 वर्षे 4 महिने 15 दिवस सक्त मजुरी आणि प्रत्येकी 10000 रुपये दंड, दंड न भरल्यास 1 महिना सक्त मजुरी अशी अतिरिक्त शिक्षा सुनावण्यात आली आहे.
ही संपूर्ण कारवाई फरासखाना पोलीस ठाण्याचे वरिष्ठ पोलीस निरीक्षक प्रशांत भस्मे आणि पोलीस निरीक्षक (गुन्हे) उत्तम नामवाडे यांच्या मार्गदर्शनाखाली पार पडली. निकालाची अधिकृत प्रत प्राप्त होताच पुढील कायदेशीर प्रक्रिया राबवली जाणार असल्याची माहिती पोलिसांकडून देण्यात आली आहे.
