पुणे : मुलांच्या आवडीचा पिझ्झा तयार करणाऱ्या स्वयंपाकघरातच जिवंत झुरळं आणि मृत झुरळांचे अवशेष आढळल्याचा प्रकार पुण्यात समोर आला आहे. अन्न व औषध प्रशासनाने (एफडीए) वारजे येथील डॉमिनोज पिझ्झाच्या आउटलेटची तपासणी केली असता स्वच्छतेसह अन्नसुरक्षेच्या नियमांमध्ये अनेक त्रुटी आढळल्या. त्यामुळे या आउटलेटचा अन्न परवाना तातडीने निलंबित करण्यात आला आहे. पुणे विभागातील २५ हून अधिक आउटलेट्सची तपासणी करण्यात आली असून, अन्य दोन ठिकाणीही गंभीर त्रुटी आढळल्याची माहिती आहे.
अन्न सुरक्षा अधिकाऱ्यांनी १३ ऑक्टोबर रोजी वारजे येथील मे. ज्युबिलंट फूडवर्क्स लिमिटेडच्या डॉमिनोज पिझ्झा आउटलेटची तपासणी केली. या वेळी स्वयंपाकघरात आणि अन्नपदार्थ साठवण्याच्या जागेत जिवंत झुरळं तसेच मृत झुरळांचे अवशेष आढळले. अन्न तयार करण्याच्या आणि साठवणुकीच्या ठिकाणी अशी अस्वच्छता आढळल्याने अन्नसुरक्षेबाबत प्रश्न उपस्थित झाले आहेत.
तपासणीदरम्यान शाकाहारी आणि मांसाहारी पदार्थ हाताळण्यासाठी वापरल्या जाणाऱ्या उपकरणांचे योग्य विभाजन नसल्याचेही समोर आले. अन्नपदार्थ स्वीकारतानाच्या तापमानाच्या नोंदी अपूर्ण होत्या. स्वच्छता आणि निर्जंतुकीकरणात त्रुटी आढळल्या, तर अन्नपदार्थांची साठवणूकही योग्य पद्धतीने होत नसल्याचे निदर्शनास आले. ग्राहकांसाठी असलेल्या जेवणाच्या जागेतील स्वच्छतागृहातून दुर्गंधी येत असल्याचेही तपासणीत नमूद करण्यात आले.
या गंभीर त्रुटींच्या पार्श्वभूमीवर एफडीएने वारजेतील आउटलेटचा अन्न परवाना तत्काळ निलंबित केला. पुणे विभागातील अन्य दोन आउटलेट्समध्येही त्रुटी आढळल्याने त्यांच्याविरुद्ध दंडात्मक कारवाईसाठी न्यायनिर्णयनाची प्रकरणे दाखल करण्यात येणार असल्याची माहिती अधिकाऱ्यांनी दिली.
या कारवाईमुळे हॉटेल आणि फास्ट फूड आउटलेट्समधील स्वच्छतेचा मुद्दा पुन्हा चर्चेत आला आहे. विशेषतः लहान मुलांना बाहेरचे पदार्थ खायला देताना पालकांनी अन्नाची गुणवत्ता आणि स्वच्छतेकडे लक्ष देणे महत्त्वाचे आहे. अन्न तयार करणाऱ्या ठिकाणी स्वच्छता राखणे आणि अन्नसुरक्षेच्या नियमांचे पालन करणे ही संबंधित आस्थापनांची जबाबदारी आहे.
