पुणे, ता. 17 : पेट्रोलियम व्यवसाय व कामगार विभागाशी संबंधित विविध प्रलंबित व ज्वलंत प्रश्न तसेच प्रशासकीय अडथळे सोडविण्याबाबत महाराष्ट्र शासनाचे कामगार मंत्री अॅड. आकाश फुंडकर यांनी सकारात्मक प्रतिसाद दिला आहे, अशी माहिती पुणे पेट्रोल डीलर्स असोसिएशन चे अध्यक्ष ध्रुव रुपारेल यांनी दिली.
मुंबई येथील मंत्रालय, मुंबई येथे मंगळवारी (ता. 17) असोसिएशनच्या पदाधिकाऱ्यांनी कामगार मंत्री अॅड. आकाश फुंडकर यांची भेट घेतली. यावेळी पेट्रोलियम व्यवसायाशी निगडित विविध अडचणी, कामगार विषयक प्रश्न तसेच प्रशासकीय अडथळ्यांवर सविस्तर चर्चा करण्यात आली.
या बैठकीस असोसिएशनचे उपाध्यक्ष विजय लांडे, धनंजय शितोळे, आबा वाल्हेकर, अमर रेणुसे, क्षितिज कांकरीया व भाग्येंद्रसिंह चूडासमा उपस्थित होते. प्रतिनिधींनी व्यवसायाशी संबंधित प्रत्यक्ष अडचणी मांडत शासन स्तरावर तातडीने उपाययोजना करण्याची मागणी केली.
दरम्यान, कामगार मंत्री अॅड. आकाश फुंडकर यांनी सर्व मुद्दे गांभीर्याने ऐकून घेत सकारात्मक भूमिका दर्शवली असून संबंधित विभागांना तत्काळ सूचना देत आवश्यक ती कार्यवाही करण्याचे आश्वासन दिले. या बैठकीनंतर पुणे जिल्ह्यातील पेट्रोल व्यावसायिकांमध्ये आशेचे वातावरण निर्माण झाले आहे.
