Katraj Accident : पुणे, ता. 28 : कात्रजकडे जाणाऱ्या मुख्य रस्त्यावर ट्रक आणि दुचाकीमध्ये झालेल्या अपघातात दुचाकीवरील तीन वर्षांच्या चिमुकल्याचा जागीच मृत्यू झाला. शनिवारी (ता. 28) सकाळी नऊ वाजण्याच्या सुमारास कात्रज परिसरातील वंडर सिटीसमोरील मुख्य रस्त्यावर हा अपघात घडला.
अंश भाऊरंग कांबळे (वय 3, रा. अंजनी नगर, कात्रज) असे मृत मुलाचे नाव आहे. ट्रक चालक इंद्रजित बाबुराव जानते (वय 50, रा. लातूर) याला पोलिसांनी ताब्यात घेतले आहे.
पोलिसांनी दिलेल्या माहितीनुसार, वडील भाऊरंग कांबळे हे मुलगा अंशला घेऊन दुचाकीवरून (क्रमांक MH12 TE 2937) निघाले होते. कात्रजकडे जाणाऱ्या मुख्य रस्त्यावर वंडर सिटीसमोर पाठीमागून येणाऱ्या ट्रकने (क्रमांक MH19 CY 9572) त्यांच्या दुचाकीला जोरदार धडक दिली. धडक इतकी भीषण होती की अंश ट्रकच्या चाकाखाली आला. ट्रकचे चाक डोक्यावरून गेल्याने त्याचा जागीच मृत्यू झाला. भारती विद्यापीठ पोलीस आणि वाहतूक पोलीस घटनास्थळी दाखल झाले.
दरम्यान, कात्रज परिसरात अपघातांचे प्रमाण वाढत असल्याची चिंता व्यक्त केली जात आहे. या मार्गावर चोवीस तास अवजड वाहनांची वर्दळ असते. त्यावर प्रभावी नियंत्रण नसल्याचे नागरिकांचे म्हणणे आहे. तसेच रस्त्यावरील निसरडेपणामुळे दुचाकीस्वारांचे नियंत्रण सुटून अपघात होण्याचे प्रमाण वाढले आहे. अवघ्या आठ दिवसांपूर्वी कात्रज डेअरीसमोर झालेल्या अपघातात एका तरुणीचा मृत्यू झाला होता. ती घटना ताजी असतानाच पुन्हा एका चिमुकल्याचा बळी गेल्याने नागरिकांमध्ये संताप व्यक्त केला जात आहे. या ठिकाणी तातडीने उपाययोजना कराव्यात, अशी मागणी नागरिकांकडून करण्यात येत आहे.
