Crime News: ओडिशा :ओडिशा (Odisha) राज्यातील जगतसिंहपूर जिल्ह्यात एका तरुणीच्या मृत्यूने खळबळ उडाली आहे. 23 वर्षांच्या महिलेवर एका दिवसात दोन वेगवेगळ्या ठिकाणी अत्याचार झाल्याचा आरोप असून नंतर तिची हत्या करण्यात आल्याची माहिती पोलिसांनी दिली आहे. या प्रकरणी दोघांना अटक करण्यात आली आहे. Rape case
पोलिसांच्या माहितीनुसार, 22 फेब्रुवारी रोजी संबंधित महिला घरातून बाहेर पडली होती. तिच्या ओळखीतील एका तरुणाने लग्नाचे आश्वासन देत तिला मंदिरात बोलावले होते. मात्र त्याने तिला एकांत ठिकाणी नेऊन जबरदस्ती केल्याचा आरोप आहे. त्यानंतर तिला रहमा बसस्थानकाजवळ सोडून दिल्याचे तपासात समोर आले आहे.
बसची वाट पाहत असताना झारखंडमधून आलेल्या एका व्यक्तीने तिला मदतीचे आश्वासन दिले. तो पारादीपकडे जात असल्याचे सांगत तिला सोबत घेऊन गेला. मात्र त्याने तिला आपल्या राहत्या इमारतीच्या छतावर नेऊन पुन्हा अत्याचार केल्याचा आरोप आहे. त्यानंतर तिला इमारतीवरून खाली फेकल्याने तिचा मृत्यू झाला. दुसऱ्या दिवशी सकाळी तिचा मृतदेह आढळून आला.
महिलेच्या भावाने 25 फेब्रुवारी रोजी पारादीप पोलीस ठाण्यात तक्रार दाखल केली. त्यापूर्वी 22 फेब्रुवारीच्या संध्याकाळी ती घरी न आल्याने हरवल्याची नोंद करण्यात आली होती. पोलिसांनी अपहरण, अत्याचार आणि खून या आरोपांखाली भारतीय न्याय संहितेच्या विविध कलमान्वये गुन्हा दाखल केला आहे.
या घटनेनंतर राज्यात संताप व्यक्त होत आहे. विरोधी पक्षनेते नवीन पटनायक यांनी या प्रकाराची निंदा करत महिलांच्या सुरक्षेबाबत सरकारने ठोस पावले उचलावीत, अशी मागणी केली आहे. त्यांनी राज्यातील वाढत्या गुन्ह्यांबाबत चिंता व्यक्त केली आहे.
