पुणे: रायगड जिल्ह्यातील खोपोलीमध्ये माजी नगरसेवक मंगेश काळोखे (Crime News) यांची झालेली निर्घृण हत्या ही केवळ राजकीय वादातून नाही, तर 20 लाख रुपयांच्या सुपारीतून झाल्याचे पोलीस तपासात उघड झाले आहे. रायगड पोलिसांनी या प्रकरणाचा तपास करत असताना पुण्यातून एका मुख्य आरोपीला ताब्यात घेतले आणि या संपूर्ण कटाचा पर्दाफाश केला. या खळबळजनक हत्याकांडात आतापर्यंत 12 जणांना अटक करण्यात आली आहे. या हत्याकांडात राष्ट्रवादी काँग्रेसच्या काही नेत्यांच्या नावांची चर्चा होती, मात्र त्यांचा थेट सहभाग अद्याप समोर आलेला नाही.
या हत्येचा कट अत्यंत नियोजनबद्ध पद्धतीने रचला गेल्याची माहिती समोर आली आहे. मुख्य सूत्रधार रवींद्र देवकर याने इशा पापा शेख हिच्या मदतीने कॉन्ट्रॅक्ट किलर्सना ही मोठी रक्कम दिली होती. पुण्याच्या हडपसर भागातून पोलिसांनी खालीद कुरेशी नावाच्या आरोपीला अटक केली असून त्याने या गुन्ह्याची कबुली दिली आहे. या कटात आदिल शेखसह इतर शूटरचाही समावेश होता.
26 डिसेंबर 2025 रोजी सकाळी मंगेश काळोखे मुलाला शाळेत सोडून घरी परतत असताना हा हल्ला झाला. खोपोलीतील जया बार परिसरात दबा धरून बसलेल्या हल्लेखोरांनी कारमधून त्यांचा पाठलाग केला आणि तलवार, कुऱ्हाडीने त्यांच्यावर सपासप वार केले. या हल्ल्यामागे राजकीय वैमनस्य असल्याचे सांगितले जाते. नुकत्याच झालेल्या नगरपालिका निवडणुकीत काळोखे यांच्या पत्नीने आरोपीच्या पत्नीचा पराभव केला होता, याच पराभवाचा बदला घेण्यासाठी हा खून करण्यात आला.
पोलिसांनी या प्रकरणात आतापर्यंत मुख्य आरोपी रवींद्र देवकर, माजी नगरसेविका उर्मिला देवकर आणि त्यांच्या मुलासह एकूण 12 जणांना बेड्या ठोकल्या आहेत. फरार असलेल्या एका आरोपीचा शोध घेण्यासाठी पोलीस पथके कसुन तपास करत आहेत.
