पुणे : पुण्यात गेल्या काही दिवसांपासून पावसाचा लपंडाव सुरू आहे. कधी कडक ऊन तर कधी हलक्या सरी, अशा संमिश्र हवामानाचा अनुभव पुणेकरांना येत आहे. पावसाने काहीशी उघडीप दिल्याने शहरातील उकाडाही वाढला आहे. अशातच भारतीय हवामानशास्त्र विभागाने (IMD) पुढील दोन ते तीन दिवसांच्या हवामानाबाबत अंदाज व्यक्त केला आहे.
पुणे शहरात हलक्या सरींची शक्यता
हवामान विभागाच्या अंदाजानुसार, पुढील दोन ते तीन दिवस पुणे शहरातील हवामानात मोठा बदल होण्याची शक्यता नाही. शहर आणि परिसरात काही ठिकाणी हलक्या पावसाच्या सरी कोसळू शकतात. मात्र, घाट परिसरात पावसाचा जोर वाढण्याचा अंदाज आहे.
घाट क्षेत्राला यलो अलर्ट
घाट परिसरात पावसाचा जोर वाढण्याची शक्यता लक्षात घेता हवामान विभागाने पुढील दोन दिवसांसाठी घाट क्षेत्राला यलो अलर्ट जारी केला आहे. त्यामुळे पुण्याच्या आसपासच्या घाटमाथ्यावर फिरायला जाणाऱ्या पर्यटकांनी खबरदारी घेण्याचे आवाहन करण्यात येत आहे. प्रवास करताना पावसाची शक्यता लक्षात घेऊन रेनकोट आणि छत्री सोबत ठेवणे आवश्यक आहे.
दिवसभर ऊन-पावसाचा खेळ
रविवारी १६ ऑगस्ट रोजी सकाळपासून पुणे शहरातील काही भागांत हलक्या पावसाच्या सरी कोसळल्या. मात्र, काही वेळातच पावसाने विश्रांती घेतली आणि दुपारच्या सुमारास उन्हाचा चटका जाणवला. सायंकाळी पुन्हा आकाशात ढग दाटून आले आणि काही भागांत हलक्या सरी बरसल्या.
शहरात सध्या मुसळधार पाऊस नसल्याने कमाल आणि किमान तापमानात वाढ झाली आहे. त्यामुळे पावसाळा सुरू असतानाही पुणेकरांना उकाड्याचा सामना करावा लागत आहे. आगामी दोन दिवसांत शहरात हलक्या सरी आणि घाट परिसरात तुलनेने जोरदार पाऊस, असे चित्र पाहायला मिळण्याची शक्यता आहे.
