पुणे: पुण्यातून एक मोठी बातमी समोर आली आहे. महापालिका निवडणुकीचे (Pune Municipal Corporation elections) बिगुल वाजत असतानाच शरद पवार यांच्या राष्ट्रवादी काँग्रेस (शरदचंद्र पवार गट) ला मोठा धक्का बसला आहे. पक्षाचे पुण्यातील विश्वासू शिलेदार आणि माजी नगरसेवक विशाल तांबे यांनी अचानक राजकारणातून संन्यास घेतल्याची घोषणा केली आहे. सोशल मीडियावर पोस्ट करत त्यांनी हा निर्णय जाहीर केला असून, यामुळे महापालिका निवडणुकीच्या तोंडावर राष्ट्रवादीची कोंडी झाल्याचे दिसून येत आहे.
विशाल तांबे हे शरद पवार आणि खासदार सुप्रिया सुळे यांचे निकटवर्तीय मानले जात होते. त्यांनी आपल्या पोस्टमध्ये “जरा विसावू या वळणावर” असा भावनिक उल्लेख करत राजकारणातून दूर होत असल्याची भावना व्यक्त केली आहे. ऐन निवडणूकिच्या तोंडावरच घेतलेल्या या निर्णयामुळे राजकीय वर्तुळात चर्चा सुरू झाली आहे.
विशाल तांबे कोण आहेत?
विशाल तांबे हे 2007, 2012 आणि 2017 मध्ये धनकवडी परिसरातून सलग तीन वेळा पुणे महापालिकेचे नगरसेवक म्हणून निवडून आले होते. याशिवाय त्यांनी पुणे महापालिकेच्या स्थायी समितीचे अध्यक्षपदही भूषवले आहे. दक्षिण पुण्यात त्यांचा मोठा जनसंपर्क आणि प्रभाव आहे.
सोशल मीडियावर केलेल्या पोस्टमध्ये आतापर्यंत त्यांनी केलेल्या कामांचा आढावा घेत, राजकारणातून ते का निवृत्त होत आहेत याबाबत आपली भूमिका स्पष्ट केली आहे. राजकारणातून निवृत्ती घेत असले तरी समाजकारण सुरूच राहील, असेही त्यांनी स्पष्ट केले आहे.
दक्षिण पुण्यात मजबूत पकड असलेल्या माजी नगरसेवक विशाल तांबे हे ऐन महापालिका तोंडावर राजकारणातून निवृत्त होत असल्याने राष्ट्रवादी काँग्रेस (शरदचंद्र पवार गट) साठी हा मोठा धक्का मानला जात आहे.
