PMC Election : पुणे महानगरपालिका निवडणुकीच्या पार्श्वभूमीवर राजकीय समीकरणं वेगाने बदलताना दिसत आहेत. शरद पवार गटाने अजित पवार गटासोबत युती केल्यानंतर पुण्यातील महाविकास आघाडीचं गणित पूर्णपणे बदललं आहे. सुरुवातीला पुण्यात महाविकास आघाडी म्हणूनच निवडणूक लढवली जाईल, अशी चर्चा होती. त्या दृष्टीने बैठका देखील झाल्या होत्या आणि अजित पवारांना महाविकास आघाडीत घेण्याबाबत विचारमंथन सुरू होतं. मात्र अजित पवारांना सोबत घेण्यास काँग्रेसने ठाम विरोध केल्याने हे समीकरण फिस्कटलं. (PMC Election)
राष्ट्रवादीचे दोन्ही गट एकत्र आल्यानंतर पुण्यात काँग्रेस कोणती भूमिका घेणार, याकडे सर्वांचं लक्ष लागलं होतं. अखेर काँग्रेसने आपली भूमिका स्पष्ट करत ठाकरे गट आणि मनसेसोबत युती जाहीर केली आहे. काँग्रेसचे नेते सतेज पाटील आणि ठाकरे गटाचे नेते सचिन आहिर यांनी पुण्यात घेतलेल्या संयुक्त पत्रकार परिषदेत या युतीची औपचारिक घोषणा केली.
या पत्रकार परिषदेत जागावाटपाचा फॉर्म्युलाही जाहीर करण्यात आला. सध्याच्या टप्प्यात पुणे महापालिकेतील एकूण १६५ पैकी १०५ जागांवर सहमती झाली आहे. त्यानुसार ६० जागांवर काँग्रेस, तर ४५ जागांवर शिवसेना ठाकरे गट निवडणूक लढवणार आहे. उर्वरित ५० जागांबाबत उद्यापर्यंत अंतिम निर्णय होणार आहे.
सूत्रांनी दिलेल्या माहितीनुसार, पुण्यासाठी ८०-६५-२० असा जागावाटपाचा फॉर्म्युला ठरवण्यात आला आहे. यामध्ये काँग्रेसला ८० जागा, ठाकरे गटाला ६५ जागा देण्यात आल्या असून २० जागा मित्र पक्षांसाठी राखीव ठेवण्यात आल्या आहेत. भविष्यात काँग्रेस-ठाकरे गट युतीसोबत इतर पक्ष आल्यास त्यांना या जागांमधून संधी दिली जाणार आहे. मनसेला ठाकरे गटाच्या कोट्यातून जागा मिळण्याची शक्यता वर्तवली जात आहे.
उद्यापर्यंत जर कोणताही नवीन मित्र पक्ष युतीत सहभागी झाला नाही, तर राखीव ठेवलेल्या २० जागा काँग्रेस आणि ठाकरे गटामध्ये आपसात वाटून घेतल्या जाणार असल्याची माहिती सूत्रांनी दिली आहे. पुणे महापालिका निवडणुकीत आता ही नवी राजकीय आघाडी कशी कामगिरी करते, याकडे सर्वांचं लक्ष लागलं आहे.
