Pune Crime: पुणे : पिंपरी-चिंचवड शहरात अमली पदार्थांच्या तस्करीविरोधात पोलिसांनी मोठी कारवाई केली आहे. जुन्या मुंबई-पुणे महामार्गावर आकुर्डी परिसरात सापळा रचून अमली पदार्थ विरोधी पथकाने दोन आलिशान कारमधून सुरू असलेली गांजाची तस्करी उघडकीस आणली. या कारवाईत पोलिसांनी एकूण ५५ किलो ५७५ ग्रॅम गांजा जप्त केला असून त्याची किंमत सुमारे ४२ लाख रुपये असल्याचे सांगण्यात आले आहे. या प्रकरणी चार जणांना अटक करण्यात आली आहे.
पोलिसांना मिळालेल्या गुप्त माहितीनुसार, आकुर्डी परिसरात संशयित वाहनांमधून अमली पदार्थांची वाहतूक होणार असल्याची माहिती मिळाली होती. त्यानुसार पोलिसांनी महामार्गावर तपासणी नाका उभारला. तपासणीदरम्यान दोन कार थांबवून पाहणी केली असता त्यामध्ये गांजाची पोती आढळून आली. यासोबतच रोख रक्कम आणि काही मोबाईल फोनही जप्त करण्यात आले.
पोलिसांच्या चौकशीत या तस्करीचे धागेदोरे थेट ओरिसा राज्याशी जोडले असल्याचे समोर आले आहे. अटक करण्यात आलेल्या आरोपींनी हा गांजा ओरिसा येथून विक्रीसाठी आणल्याची कबुली दिली आहे. या प्रकरणी नूरमोहमद शिराजउद्दीन शेख वय २९ रा. चिखली, मोहियोद्दीन लियाकत कुरेशी वय ३० रा. चिंचवड, आयेशा नूरमोहमद शेख आणि आणखी एका महिलेला अटक करण्यात आली आहे.
तसेच या गुन्ह्यात सहभागी असल्याचा संशय असलेल्या कुमार, विशाल आणि रुपेश मुळूक यांच्या विरोधात निगडी पोलीस ठाण्यात गुन्हा दाखल करण्यात आला असून त्यांचा शोध सुरू आहे. पोलिसांनी या कारवाईत गांजा, दोन कार आणि इतर साहित्य असा मोठा मुद्देमाल जप्त केला आहे.
शहरात अमली पदार्थांचा पुरवठा करणाऱ्या मोठ्या टोळीचा हा भाग असण्याची शक्यता पोलिसांनी व्यक्त केली आहे. या तस्करीमागे आणखी कोणकोण सहभागी आहेत, याचा तपास सुरू असून पुढील चौकशीत आणखी धक्कादायक माहिती समोर येण्याची शक्यता आहे.
