Pune Crime : पिंपरी चिंचवड : पिंपरी चिंचवडमधील चाकण (Chakan) परिसरात दोन कंपन्यांमधील अधिकृत व्यवहारात सायबर चोरट्यांनी शिरकाव करून लाखो रुपयांची फसवणूक केल्याचे उघड झाले आहे. चोरट्यांनी कंपनीच्या खऱ्या ईमेल आयडीसारखा हुबेहूब दिसणारा बनावट आयडी तयार करून 8 लाख 81 हजार 942 रुपयांचा चुना लावला आहे. या प्रकरणी चाकण पोलीस ठाण्यात अज्ञात व्यक्तीविरुद्ध गुन्हा दाखल करण्यात आला असून पोलीस अधिक तपास करत आहेत.
मिळालेल्या माहितीनुसार चाकण येथील एस. के. एस. फास्टनर्स लिमिटेड या कंपनीचे चीनमधील एका कंपनीसोबत व्यावसायिक कामे सुरू होती. 18 नोव्हेंबर 2024 ते 18 एप्रिल 2025 या दरम्यान दोन्ही कंपन्यांमध्ये ईमेलद्वारे पत्रव्यवहार होत होता. याच काळात एका सायबर चोरट्याने मूळ कंपनीच्या ईमेल आयडीशी मिळताजुळता असा दुसरा बनावट आयडी बनवला. या बनावट ईमेलचा वापर करून त्याने दोन्ही कंपन्यांच्या संवादात स्वतःचा हस्तक्षेप वाढवला. समोरच्या कंपनीला संशय येऊ नये अशा पद्धतीने विश्वास संपादन करून त्याने 8 लाख 81 हजार रुपयांची रक्कम स्वतःच्या बँक खात्यात वळवून घेतली.
काही काळानंतर जेव्हा पैशांच्या व्यवहाराबाबत काही तांत्रिक प्रश्न निर्माण झाले तेव्हा कंपनीच्या व्यवस्थापनाला शंका आली. त्यांनी अधिक तपास केला असता त्यांच्या अधिकृत ईमेलचा गैरवापर करून फसवणूक झाल्याचे समोर आले. या प्रकारामुळे व्यावसायिक क्षेत्रात मोठी खळबळ उडाली आहे. कंपनीच्या प्रतिनिधीने शुक्रवारी ६ मार्च रोजी या घटनेची तक्रार दिल्यानंतर पोलिसांनी गुन्ह्याची नोंद केली आहे. सध्याच्या काळात ईमेल हॅकिंगचे प्रमाण वाढत असल्याने मोठे आर्थिक व्यवहार करताना कंपन्यांनी अधिक सतर्क राहणे गरजेचे बनले आहे.
