पिंपरी: पिंपरी-चिंचवड महापालिका (PCMC) प्राथमिक शाळांमध्ये मुख्याध्यापकांच्या (principal) जागा रिक्त असल्याने सुमारे 30 शाळा मुख्याध्यापकांशिवायच सुरू असल्याची माहिती समोर आली आहे. महापालिकेच्या (Pimpri-Chinchwad Schools) एकूण 105 प्राथमिक शाळांपैकी, अनेक ठिकाणी शिक्षकांवरच मुख्याध्यापकाची अतिरिक्त जबाबदारी सोपवण्यात आली आहे.
मागील वर्षभरात सेवानिवृत्ती किंवा इतर कारणांमुळे मुख्याध्यापकांची तब्बल 84 पदे रिक्त झाली आहेत. शिक्षण विभागाने या जागा भरण्यासाठी जूनपासून सेवाज्येष्ठतेनुसार शिक्षकांना पदोन्नती देण्याची प्रक्रिया सुरू केली. मात्र, अनेक सेवाज्येष्ठ शिक्षक पदोन्नती स्वीकारण्यास तयार नाहीत. काही शिक्षकांनी आपण सध्याच्या ठिकाणीच सेवा देणार असल्याचे प्रशासनाला सांगितले आहे.
विद्यार्थ्यांच्या शिक्षणावर परिणाम
मुख्याध्यापकांच्या रिक्त जागांमुळे विद्यार्थ्यांच्या शैक्षणिक तासिकेवर परिणाम होत आहे. प्रभारी मुख्याध्यापक म्हणून काम करणाऱ्या शिक्षकांना शिकवण्यासोबतच इतर अशैक्षणिक कामांची जबाबदारी सांभाळावी लागत आहे. यात गणवेश वाटप, खिचडीचे नियोजन, आणि शालेय समितीच्या बैठकांसारख्या कामांचा समावेश आहे. त्यामुळे मुख्याध्यापक नसलेल्या शाळांमध्ये शिक्षकांना शिकवणे आणि व्यवस्थापन सांभाळणे अशी तारेवरची कसरत करावी लागत आहे.
नियमांचे उल्लंघन
नियमांनुसार, 100 पेक्षा जास्त पटसंख्या असलेल्या शाळांमध्ये पूर्णवेळ मुख्याध्यापक असणे बंधनकारक आहे. मात्र, अनेक शाळांमध्ये उपशिक्षकांकडेच मुख्याध्यापकांचा पदभार देण्यात आला आहे. शाळांना लवकरात लवकर पूर्णवेळ मुख्याध्यापक मिळाल्यास शिक्षकांचा ताण कमी होईल आणि शैक्षणिक कामांवर लक्ष केंद्रित करता येईल, अशी अपेक्षा शिक्षक व्यक्त करत आहेत.
