पिंपरी चिंचवड: पिंपरी चिंचवड शहरात महानगरपालिका निवडणुकीचे वारे जोरात वाहू लागले असून उमेदवारी अर्ज मागे घेण्याची मुदत संपल्यानंतर आता अंतिम लढतींचे चित्र स्पष्ट झाले आहे. शहरातील एकूण 32 प्रभागांमधील 128 जागांसाठी ही निवडणूक होत असून, तब्बल 692 उमेदवार निवडणुकीच्या रिंगणात उतरले आहेत.
उमेदवारी अर्ज मागे घेण्याची वेळ संपल्यानंतर आता शहरात कोणाचे पारडे जड आहे, याची चर्चा रंगू लागली आहे. या निवडणुकीत भारतीय जनता पक्षाने मोठी आघाडी घेतली असून त्यांचे १२५ अधिकृत उमेदवार रिंगणात उतरले आहेत. याव्यतिरिक्त ३ उमेदवारांना त्यांनी पाठिंबा दिला आहे. विशेष म्हणजे मतदानाआधीच भाजपचे २ उमेदवार बिनविरोध निवडून आले असून आरपीआयचे ५ कार्यकर्ते सुद्धा भाजपच्याच चिन्हावर निवडणूक लढवत आहेत.
राष्ट्रवादी काँग्रेस आणि शिवसेना या दोन प्रमुख पक्षांमध्ये झालेल्या फुटीमुळे या निवडणुकीत मोठी रंगत पाहायला मिळणार आहे. अजित पवार यांच्या गटाचे ११८ जागांवर उमेदवार, तर शरद पवार यांच्या गटाचे ११ उमेदवार मैदानात आहेत. तसेच एकनाथ शिंदे यांच्या नेतृत्वाखालील शिवसेनेने ५७ जागांवर उमेदवार उभे केले असून उद्धव ठाकरे यांच्या गटाचे ५० उमेदवार निवडणूक लढवत आहेत. काँग्रेस पक्षाने सुद्धा ४९ उमेदवार उतरवले असून राज ठाकरे यांच्या मनसेचे १४ उमेदवार आपले नशीब आजमावत आहेत.
यावेळच्या निवडणुकीचे सर्वात मोठे वैशिष्ट्य म्हणजे १६६ अपक्ष उमेदवारांनी भरलेले अर्ज हे आहे. यामुळे अनेक प्रभागांमध्ये आता चौरंगी लढती होण्याची दाट शक्यता आहे. प्रमुख पक्षांतील बंडखोरी आणि अपक्ष उमेदवारांची संख्या पाहता, ही निवडणूक कोणा एका पक्षासाठी सोपी नसेल. राजकीय पक्षांच्या दिग्गज नेत्यांनी आता शहरात प्रचाराच्या सभांचे नियोजन करण्यास सुरुवात केली आहे. पिंपरी चिंचवडवर सत्ता मिळवण्यासाठी सर्वच पक्षांनी कंबर कसली असून मतदारांचा कौल कोणाच्या बाजूने आहे, हे येणाऱ्या काळात स्पष्ट होईल.
