Fire : पुण्यातील पिंपरी-चिंचवडमधून एक धक्कादायक घटना समोर आली आहे. एका खासगी रुग्णालयाच्या खाली असलेल्या फटाक्यांच्या दुकानाला अचानक भीषण आग लागली, आणि काही वेळातच परिसरात एकच खळबळ उडाली. (fire)
मिळालेल्या माहितीनुसार, ही घटना काळेवाडीतील तापकीर चौकात दुपारच्या सुमारास घडली. गजानन मल्टीस्पेशालिटी हॉस्पिटलच्या खाली असलेल्या फटाक्यांच्या दुकानातून अचानक धूर आणि आगीच्या ज्वाळा उसळल्या. क्षणातच आग भडकली आणि संपूर्ण दुकान आगीच्या तडाख्यात सापडलं.
घटनेची माहिती मिळताच अग्निशमन दलाचे तीन बंब तातडीने घटनास्थळी दाखल झाले. सध्या आग आटोक्यात आणण्यासाठी जोरदार प्रयत्न सुरू आहेत. आगीचं नेमकं कारण मात्र अद्याप स्पष्ट झालेलं नाही.
सुदैवाची बाब म्हणजे, या आगीत कोणी अडकल्याची माहिती आतापर्यंत मिळालेली नाही. मात्र, फटाक्यांच्या दुकानाच्या शेजारीच सिलेंडर दुरुस्तीचं दुकान असल्यामुळे परिसरात भीतीचं वातावरण पसरलं आहे. खबरदारी म्हणून रुग्णालयात कुणी अडकले आहे का, याचीही तपासणी सुरू आहे.
घटनास्थळी मोठ्या प्रमाणात गर्दी जमली असून, अग्निशमन दल आग पूर्णपणे विझवण्यासाठी शर्थीचे प्रयत्न करत आहे. परिस्थिती नियंत्रणात आणण्याचं काम सुरू असून पुढील माहितीची प्रतीक्षा आहे.
