Election : महापालिका निवडणूक २०२६ च्या पार्श्वभूमीवर सहकारनगर-धनकवडी क्षेत्रीय कार्यालयात उमेदवारी अर्जांच्या छाननीदरम्यान गंभीर प्रकार घडल्याची घटना समोर आली आहे. दिनांक ३१ डिसेंबर २०२५ रोजी दुपारी सुमारे २ ते २:३० वाजण्याच्या सुमारास ही घटना घडली. (Election)
छाननी प्रक्रियेदरम्यान एकाच पक्षाचे दोन उमेदवार उद्धव लहू कांबळे आणि मच्छिंद्र दत्तू ढवळे यांना एकाच पक्षातून जोडपत्र क्रमांक १ व २ देण्यात आले असल्याबाबत खात्री केली जात असताना, उद्धव लहू कांबळे यांनी त्यांच्याच पक्षातील उमेदवार मच्छिंद्र दत्तू ढवळे यांचे जोडपत्र क्रमांक १ व २ पाहण्यासाठी मागितले. मात्र हे दस्तऐवज हातात घेतल्यानंतर त्यांनी ते फाडून तोंडात टाकले आणि बाथरूमच्या दिशेने पळ काढल्याची माहिती दुपारी प्रशासनाला मिळाली.
या घटनेनंतर संध्याकाळी निवडणूक निर्णय अधिकारी यांच्या वतीने रात्री ८ वाजता संबंधित प्रकरणी तक्रार दाखल करण्यात आली. त्या आधारे भारतीय न्याय संहिता कलम १३२ आणि ३२४(२) अन्वये गुन्हा दाखल करण्यात आला आहे. सरकारी कामात अडथळा आणणे आणि निवडणूक प्रक्रियेशी संबंधित महत्त्वाच्या दस्तऐवजांचे खोडसाळपणे नुकसान करणे, या आरोपांखाली ही कारवाई करण्यात आली आहे
