लोणी काळभोर, ता. ५ : पुणे-सोलापूर राष्ट्रीय महामार्गावर टेम्पो व दुचाकीचा अपघात झाल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील वाकवस्ती परिसरात असलेल्या जगदंबा मल्टीस्पेशालिटी हॉस्पीटलजवळ बुधवारी (ता. 4) रात्री अकरा वाजण्याच्या सुमारास घडली आहे. या अपघातात दुचाकीस्वाराचा जागीच मृत्यू झाला आहे.
सुरेश विठ्ठल कांबळे (वय ३३ , रा. रा. पांढरे मळा, वागले निवास, तुकाई मंदिराजवळ, कदमवाक वस्ती, लोणी काळभोर, ता. हवेली, जि. पुणे) असे मृत्यू झालेल्याचे नाव आहे. तर एकनाथ नवनाथ चोरमले (वय २३, रा. गाडमोडी, खामगाव, ता. दौंड, जि. पुणे) असे गुन्हा दाखल करण्यात आलेल्या वाहनचालकाचे नाव आहे. याप्रकरणी सुरेशचे वडील विठ्ठल लक्ष्मण कांबळे (वय ६३) यांनी लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, सुरेश कांबळे हे घोरपडी रेल्वे स्टेशन येथे खाजगी कामगार म्हणून काम करतो. सुरेश हे नेहमीप्रमाणे रात्रपाळीसाठी बुधवारी दुचाकीवरून चालले होते. पुणे-सोलापूर महामार्गावरून पुण्याकडे जात असताना, त्यांची दुचाकी व सोलापूरकडून पुण्याच्या दिशेने जाणाऱ्या टेम्पोचा जगदंबा मल्टीस्पेशालिटी हॉस्पीटलजवळ अपघात झाला. या अपघातात सुरेश कांबळे यांचा जागीच मृत्यू झाला.
दरम्यान, टेम्पो चालक एकनाथ चोरमले याने वाहतुकीच्या नियमांकडे दुर्लक्ष करून भरधाव वेगाने गाडी चालविली. यामुळे सुरेश चालवित असलेल्या मोटर सायकलला मागुन जोरात धड़क बसली. टेम्पो चालक, या अपघातात सुरेश गंभीर जखमी होण्यास मृत्यूस कारणीभूत ठरला आहे. अशी फिर्याद विठ्ठल कांबळे यांनी लोणी काळभोर पोलीस ठाण्यात दिली आहे.
त्यानुसार आरोपी टेम्पो चालक एकनाथ चोरमले याच्यावर भारतीय न्याय संहिता २०२३ चे कलम २८१, १२५ (बी), १०६(१), ३२४(४) मोटार वाहन कायदा कलम १८४, ११९/१७० अन्वये गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक दिगंबर सोनटक्के करीत आहेत.
