पुणे : तुझा नवरा आमच्या ग्रुपमधील मुलांना खुन्नस देत आहे, त्याला मी मारुन टाकीन… अशी धमकी देत तीन सराईत गुन्हेगारांनी दोघांवर कोयत्याने वार करून गंभीर जखमी केल्याची घटना पुण्यातील तळजाई वसाहत परिसरात घडली. ही घटना शनिवारी (ता. १८) सायंकाळी साडेसहाच्या सुमारास तळजाई वसाहत, पद्मावती येथे घडली.
याप्रकरणी निरंजन दत्ता थोरात (वय-२१, रा. लुंकड शाळा, तळजाई वसाहत, पद्मावती, पुणे) याने सहकारनगर पोलीस ठाण्यात फिर्य़ाद दिली असून विनायक गायकवाड, तुषार उर्फ डेंब्या आरणे, राज उर्फ हिरव्या वाघमारे (सर्व रा. तळजाई वसाहत, पुणे) यांच्यावर गुन्हा दाखल करुन अटक करण्यात आली आहे. या गुन्ह्यातील आरोपी रेकॉर्डवरील गुन्हेगार असल्याची माहिती पोलिसांनी दिली.
पोलिसांनी दिलेल्या माहितीनुसार, फिर्यादी निरंजन त्याची पत्नी व दाजी जालिंदर हे तिघे राहत्या घराच्या समोरील बोळात जळणासाठी लाकूडफाटा तोडत असताना, निरंजन याच्या परिचयाचे असलेले आरोपी त्याठिकाणी आले. त्यावेळी आरोपी विनायक याने फिर्यादी यांच्या पत्नीचा हात धरुन सांगितले की, ‘तू मला राखी बांधते.
तुझ्या नवऱ्याला नीट समजावून सांग, तो आमच्या ग्रुपमधील पोरांना खुन्नस देत आहे, त्याला मी मारुन टाकीन’ अशी धमकी दिली आणि विनायक आणि तुषार यांनी निरंजन व दाजी जालिंदर यांच्यावर कोयत्याने सपासप वार करुन जीवे मारण्याचा प्रयत्न केला. या दरम्यान, राज वाघमारे याने फिर्यादीच्या पत्नीचा हात पिरगाळून दाजी जालिंदर यांना बेदम मारहाण केली. या घटनेचा पुढील तपास पोलीस उपनिरीक्षक खंडाळे करीत आहेत.
