पुणे : शहर आणि परिसरात अल्पवयीन मुलींवरील अत्याचाराच्या घटनांमध्ये वाढ होत आहे. बारा वर्षे वयाच्या एका अल्पवयीन मुलीचा पाठलाग करुन, माझे तुझ्यावर प्रेम आहे. तू मला सोडून जाऊन नकोस, असे सांगत हात पकडून तिचा विनयभंग केला. तसेच तिचा मानसिक छळ केल्याची धक्कादायक घटना नुकतीच कोथरुड परिसरात घडली. याप्रकरणी ३० वर्षीय नराधमाविरोधात पोक्सो कायद्यांतर्गत गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, पीडित अल्पवयीन मुलीच्या आईने कोथरुड पोलीस ठाण्यात फिर्याद दिल्यानंतर अक्षय पासुटे (वय ३०, रा. हनुमाननगर, कोथरुड) या नराधमावर पोक्सो कायद्यानुसार गुन्हा दाखल केला आहे. आरोपीने फिर्यादीच्या १२ वर्षांच्या मुलीचा वारंवार पाठलाग केला. माझे तुझ्यावर प्रेम आहे. तू मला सोडून तुझ्या आजीकडे जाऊन नको, असे म्हणत तिचा हात पकडून विनयभंग केला. संबंधित मुलगी शाळेत जात असताना आरोपी पासुटे याने तिचा पाठलाग केला. मैत्रिणींसोबत गेली असता त्याने तिचे दफ्तर ओढणे, केस ओढून तिची छेड काढली. तसेच जोराच्या आवाजात ‘आय लव्ह यू’ म्हणत तिला मानसिक त्रास दिल्याचे फिर्यादीत नोंदवले आहे.
हा प्रकार सप्टेंबर ते डिसेंबर २०२३ या कलावधीत कोथरुड परिसरात घडला. याबाबत मुलीने आपल्या आईला माहिती दिल्यानंतर त्यांनी नातेवाईकांशी चर्चा करुन मंगळवारी फिर्याद दाखल केली. या घटनेचा अधिक तपास पोलीस उपनिरीक्षक काटकर करीत आहेत.
