लोणी काळभोर: सरपंचाविरुद्धच्याअविश्वास ठरावाचा वाद तहसीलदार ते सर्वोच्च न्यायालयापर्यंत गेल्याने बहुचर्चित आलेल्या कोरेगाव मूळ (ता. हवेली) ग्रामपंचायतीच्या सरपंचपदी अखेर मंगेश अशोक कानकाटे विराजमान झाले आहेत.
कोरेगाव मूळ (ता. हवेली) ग्रामपंचायतीचे तत्कालीन सरपंच विठ्ठल राजाराम शितोळे यांच्या विरोधात 10 विरुद्ध 3 मतांनी अविश्वास ठराव मंजूर झाला होता. या ठरावाच्या विरोधात शितोळे यांनी जिल्हाधिकाऱ्यापासून सर्वोच्च न्यायालयापर्यंत दाद मागितली होती. मात्र उच्च न्यायालयाने विठ्ठल शितोळे यांची याचिका फेटाळून लावली. त्यानंतर शितोळे यांनी थेट सर्वोच्च न्यायालयात याचिका दाखल करत शेवटचा पर्यायही अवलंबून पाहिला. परंतु, सर्वोच्च न्यायालयाने हे प्रकरण तात्काळ निकाली काढत मुंबई उच्च न्यायालयाचा निकाल कायम ठेवला. त्यामुळे विठ्ठल शितोळे यांचे सरपंच पद रद्द झाले होते. सरपंच पद रिक्त झाल्याने प्रशासनाने सरपंचपदाच्या निवडणूकीचे आदेश दिले होते.
सरपंच पदाची निवडणूक प्रक्रिया कोरेगाव मूळ ग्रामपंचायतीच्या कार्यालयात गुरुवारी (ता.०४) पार पडली. ही निवडणूक प्रक्रिया उरुळी कांचनच्या मंडलाधिकारी तथा निवडणूक निर्णय अधिकारी नूरजहाँ सय्यद यांच्या अध्यक्षपदाखाली पार पडली. या निवडणूक प्रक्रियेत मंगेश कानकाटे यांचा एकमेव अर्ज आल्याने नूरजहाँ सय्यद यांनी कानकाटे यांची सरपंचपदी बिनविरोध निवड झाल्याची घोषणा केली. तर या निवडणूक प्रक्रियेत ग्रामसेवक सतिश कालेकर यांनी शासकीय कामकाज पहिले.
दरम्यान, मंगेश कानकाटे यांची सरपंचपदी निवड होताच, कार्यकत्यांनी गुलालाची उधळून करून एकच जल्लोष केला. तर ग्रामपंचायतीच्या वतीने नवनिर्वाचित सरपंच मंगेश कानकाटे यांचा सत्कार करण्यात आला. यावेळी ग्रामपंचायत सदस्य बापूसाहेब बोधे, विठ्ठल शितोळे, दत्तात्रय काकडे, सचिन निकाळजे, वैशाली सावंत, भानुदास जेथे, लीलावती बोधे, राधिका काकडे, मंगल पवार, मनीषा कड, अश्विनी कड, पल्लवी नाझीरकर आदी मान्यवर उपस्थित होते.
