बारामती, (पुणे) : गाडी घेण्यासाठी माहेरहून पैसे घेऊन ये, या मागणीसाठी विवाहितेच्या पतीने गळा दाबत तिला फिनेल पाजून जीवे मारण्याचा प्रयत्न केल्याची घटना बारामती शहर परिसरात घडली आहे. शुक्रवारी (ता. 24) ही घटना घडली आहे. याप्रकरणी बारामती शहर पोलिसांत सासू, सासरे, पतीसह सात जणांविरोधात गुन्हा दाखल करण्यात आला आहे.
आरती निलेश लोणकर असे पिडीत महिलेचे नाव असून त्यांनी दिलेल्या तक्रारीनुसार पोलिसांनी नवरा निलेश मारुती लोणकर (वय 35), सासु वंदना मारुती लोणकर (वय 58), सासरे मारूती लोणकर (वय- 65), दिर उमेश मारुती लोणकर व मंगेश मारुती लोणकर, जाऊ शुभांगी, उमेश लोणकर, ननंद उमा नितीन घनवट (वय 33) व नितीन घनवट (वय 42, रा. दोघे डोर्लेवाडी ता. बारामती) यांच्या विरोधात गुन्हा दाखल केला आहे. तर आरती लोणकर या पिडीत विवाहितेवर सध्या शासकीय रुग्णालयात उपचार सुरु आहेत.
पोलिसांनी दिलेल्या माहितीनुसार, 2020 मध्ये निलेश आणि आरतीचा विवाह झाला होता. गाडी घेण्यासाठी माहेरहून पैसे आणावेत, या मागणीसाठी सासरच्या मंडळीकडून शारीरिक आणि मानसिक छळ करण्यात येत होता. शुक्रवारी पती निलेशने आरतीला तू माहेरहून दहा लाख रुपये घेऊन का येत नाही, तुझ्या वडिलांनी लग्नामध्ये टीव्ही, फ्रीज, वॉशिंग मशीन दिलेले नाही. ते तु घेऊन ये, असे तिला म्हणत मारहाण केली. आरतीला मारण्यासाठी पती निलेश हा चाकू शोधू लागला. त्याला चाकू न सापडल्याने त्याने बाथरुममधील फरशी धुण्याचे फिनेल आणले आणि आरतीला जमिनीवर पाडून तोंडामध्ये ते ओतले. त्यानंतर आरतीने त्याच्या तावडीतून सुटका करून घेतली.
दरम्यान, पीडित आरतीने पोलिसांशी संपर्क साधून तक्रार दाखल केली. तिच्यावर सध्या शासकीय रुग्णालयात उपचार सुरु आहेत. सासरच्या मंडळींनी तिला शारिरिक व मानसिक त्रास दिला. तिच्याजवळ असलेले दागिने काढून घेण्यात आले असल्याचे आरतीने तक्रारीत नमूद केले आहे. तिने दिलेल्या तक्रारीनुसार सासरकडील मंडळींवर गुन्हा दाखल करण्यात आला आहे.
.
