Loni Kalbhor Crime: लोणी काळभोर, ता. 18 : ऑनलाईन मटका जुगाराचा पर्दाफाश करण्यास लोणी काळभोर पोलिसांना यश आले आहे. पोलिसांनी लोणी काळभोर (ता. हवेली) येथे छापा टाकून एकाला बुधवारी (ता.17) रात्री साडेआठ वाजण्याच्या सुमारास अटक केली आहे. या कारवाईत पोलिसांनी रोख रकमेसह सुमारे 21 हजार रुपयांचा मुद्देमाल जप्त केला आहे.
ऋतिक गणेश बोबडे (वय २४, रा. २०४, दुसरा मजला, शांती हाईट्स, साधना बँकेचे पाठीमागे, लोणी काळभोर, ता. हवेली, जि. पुणे) असे गुन्हा दाखल करण्यात आलेल्या आरोपीचे नाव आहे. याप्रकरणी पोलीस हवालदार तेज दिपक भोसले यांनी सरकारच्या वतीने लोणी काळभोर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी ऋतिक बोबडे हा मोबाईलमध्ये बेकायदेशीररित्या कल्याण मटका नावाचा जुगार चालवीत आहे. आणि तो जुगार घेऊन व्हाटसअॅप द्वारे गॉडफादर नावाने सेव्ह असलेले नंबर वरती पाठवत आहे. अशी माहिती पोलिसांना एका खबऱ्यामार्फत मिळाली होती. त्यानंतर पोलिसांनी छापा टाकून वरील कारवाई केली आहे.
या छाप्यात 11 हजार रुपये रोख रक्कम, 10 हजार रुपये किंमतीचा मोबाईल असा सुमारे 21 हजार रुपयांचा मुद्देमाल जप्त केला आहे. तर ऋतिक बोबडे याच्यावर महाराष्ट्र जुगार प्रतिबंध अधिनियम कलम 12 (अ) प्रमाणे गुन्हा दाखल करून अटक केली आहे. पुढील तपास लोणी काळभोर पोलीस ठाण्याचे सहाय्यक पोलीस निरीक्षक कृष्णा बाबर करत आहेत.
