आयुष्यात प्रत्येकानं अनुभवावा असा असतो आषाढी वारीचा पालखी सोहळा. मात्र अनेकदा कामाच्या व्यापामुळे किंवा इतर अडचणींमुळे प्रत्यक्ष हजर राहून हा अनुभव घेणं शक्य होत नाही. त्यामुळे अनेक भाविक सोशल मीडियाच्या माध्यमातून घरी बसूनच पालखी सोहळा पाहतात. पालखी ज्या मार्गाने जाते, त्या मार्गावर वाहतुकीत अडथळा येऊ नये म्हणून विविध रस्त्यांमध्ये बदल केले जातात. काही ठिकाणी पार्किंगची विशेष व्यवस्था केली जाते, तर काही ठिकाणी ती बदलली जाते. अशा वेळी वाहतूक, रस्ते बंद, पार्किंग व्यवस्था यासंदर्भातील सगळी अपडेट्स कुठे आणि कशी मिळवायची, असा प्रश्न अनेकांना पडतो. याच समस्येवर पुणे पोलिसांनी यंदा एक स्मार्ट उपाय शोधून काढला आहे.
पुणे पोलिसांकडून यंदा संत ज्ञानेश्वर माऊली पालखी सोहळ्याच्या संपूर्ण मार्गाचं लाईव्ह ट्रॅकिंग सुरू करण्यात आलं आहे. पालखी पुण्यात दोन दिवस मुक्कामी असणार आहे. त्यामुळे त्या भागातील ट्रॅफिक अपडेट्स, रस्त्यांमधील बदल, पार्किंग व्यवस्था यासंदर्भातील सगळी माहिती पुणे पोलिसांच्या संकेतस्थळावरून थेट लाईव्ह दिली जाणार आहे. पालखी या क्षणी नेमकी कुठे आहे, वाहतूक कशी आहे, कोणते रस्ते बंद आहेत आणि कुठे डायव्हर्जन करण्यात आले आहे, याबाबत घरबसल्या एका क्लिकवर माहिती मिळणार आहे.
यासाठी पुणे पोलिसांच्या diversion.punepolice.gov.in या अधिकृत वेबसाईटला भेट द्यावी लागेल. या वेबसाईटवर “Live Tracking” हे पर्याय निवडल्यावर तुम्हाला पालखीचा संपूर्ण मार्ग नकाशावर दिसेल. या नकाशावर झूम इन किंवा झूम आउट करून तुम्ही सध्याचे अपडेट्स पाहू शकता. ज्या रस्त्यांवर वाहतूक बंद आहे, तेथे लाल रंगाचं मार्किंग करण्यात आलं आहे. जिथे वाहतुकीचं डायव्हर्जन आहे, तेथे हिरव्या रंगाचं चिन्ह दाखवण्यात आलं आहे. तसेच, जिथे पिवळ्या रंगाचं घड्याळ दिसतं तिथे त्या क्षणाचं ताजं अपडेट उपलब्ध आहे.
संत ज्ञानेश्वर माऊली पालखी सोहळ्याच्या यंदाच्या वेळापत्रकानुसार, १९ जून रोजी आळंदीहून माऊलींची पालखी प्रस्थान करत आहे. २० जून रोजी पालखी आळंदीहून पुण्यात पोहोचेल. २१ जून रोजी पुण्यात मुक्काम असेल. २२ जूनला पुण्याहून सासवडकडे प्रस्थान होईल आणि २३ जूनला सासवडमध्ये मुक्काम असेल. २४ जून रोजी सासवडहून जेजुरी, २५ जूनला जेजुरीहून वाल्हे, २६ जूनला वाल्हेहून लोणंद आणि २७ जून रोजी माऊली पालखी लोणंदहून तरडगावकडे प्रस्थान करेल.
पुणे पोलिसांनी सुरू केलेल्या या डिजिटल सुविधेमुळे आता पालखी सोहळ्याशी संबंधित सगळी माहिती मिळवणं अधिक सुलभ आणि तांत्रिकदृष्ट्या अत्याधुनिक झालं आहे. घरबसल्या श्रद्धेचा अनुभव घेण्यासाठी हे एक उत्तम माध्यम ठरणार आहे.
