फुरसुंगी : “एक गावठी पिस्तूल व एक जिवंत राऊंड” असा साठा बाळगणाऱ्या दोन सराईतांना फुरसुंगी पोलिसांच्या (Fursungi News) तपास पथकाने बेड्या ठोकल्या आहेत. दोन्ही आरोपींकडे बेकायदेशीररीत्या शस्त्रसाठा सापडल्याने त्यांच्यावर फुरसुंगी पोलीस ठाण्यात गुन्हा दाखल करण्यात आला आहे.
नसीम उमर मोहम्मद अनसारी (वय – 37, रा. वडगावशेरी, हडपसर पुणे), व राकेश जानी सकट (वय 25, रा. तावडीवाडी रोड, उर्से, पुणे) अशी ताब्यात घेण्यात आलेल्या दोघांची नावे आहेत. दोघेही पूर्वीपासूनच गुन्हेगारी प्रवृत्तीचे असून त्यांच्यावर गंभीर स्वरूपाचे गुन्हे दाखल असल्याचे पोलिस तपासात स्पष्ट झाले आहे.
पोलिसांनी दिलेल्या माहितीनुसार, शुक्रवारी (ता. 12) संध्याकाळी साडेअकरा वाजण्याच्या सुमारास फुरसुंगी तपास पथकातील अंमलदार हेमंत कामथे यांना खबऱ्याकडून माहिती मिळाली की, हांडेवाडी रोड ग्रिन हील हॉटेल जवळील कात्रज बायपास रोडवर उरुळी देवाची (ता. हवेली) येथे दोन इसम संशयितपणे थांबले असून त्यांच्याकडे विनापरवाना पिस्टल सारखे हत्यार असण्याची शक्यता आहे,
सदरची माहिती वरिष्ठांना कळवून घटनास्थळी पंचासह जावुन बातमीप्रमाणे दोन संशयित इसम थांबल्याचे दिसुन आले, त्यांना पोलीस स्टाफने झडप घालुन ताब्यात घेतले. त्यांच्याकडे नाव व पत्ता विचारले असता त्यांनी त्यांची नावं वरीलप्रमाणे सांगितले.
नसीम उमर मोहंमद अन्सारी याच्या कंबरेला एक गावठी पिस्टल व एक जिवंत राउंड मिळून आला, त्याच्या सोबत असलेल्या राकेश सकट याने देखील त्याच्या साथीदारासोबत येण्याबाबत समाधानकारक माहीत दिली नाही, तसेच त्यांच्याकडे हत्यार बाळगण्याबाबत कोणताही परवाना नसल्याचे दिसुन आले, त्यामुळे सदर हत्यार घटनास्थळीच पंचनाम्याने जप्त करण्यात आले, व संशयितांना ताब्यात घेवुन पोलीस स्टेशनला येऊन त्यांचा अभिलेख तपासला असता सदर आरोपी हे पुणे शहरातील रेकॉर्डवरील गंभीर गुन्हयातील सराईत गुन्हेगार असल्याचे दिसुन आले.
दरम्यान, दोन्ही आरोपींविरुद्ध फुरसुंगी पोलिस ठाण्यात गुन्हा दाखल करण्यात आला असून त्यांच्यावर शस्त्र कायदा कलम 3(25) व 35, तसेच भादंवि कलम 37(1)(3), 135 प्रमाणे गुन्हा नोंदविण्यात आला आहे. सदर गुन्हयाचा तपास पोलीस उपनिरीक्षक विष्णु देशमुख हे करीत आहेत.
ही कारवाई वरिष्ठ पोलीस निरीक्षक अमोल मोरे, गुन्हे पोलीस निरीक्षक राजेश खांडे यांच्या सुचनेप्रमाणे तपास पथकातील पोलीस उपनिरीक्षक विष्णु देशमुख, पोलीस हवालदार नितीन गायकवाड, सागर वणवे, हरी कदम, श्रीनाथ जाधव, पोलीस अंमलदार हेमंत कामथे, अभिजीत टिळेकर, योगेश गायकवाड, विनायक पोमण, नितीन सोनवणे यांच्या पथकाने केली आहे.
