पुणे : माझ्या पुढे तू गेलासच कसा असे म्हणत एका ट्रक चालकाने चारचाकी चालकाला मारहाण करून गंभीर जखमी केल्याचा प्रकार समोर आला आहे. याप्रकरणी विमानतळ पोलिस ठाण्यात गुन्हा दाखल करण्यात आला आहे. ही घटना लोहगाव वाघोली रोडवर 3 जानेवारी रोजी मध्यरात्री साडेबारा ते पाऊणच्या सुमारास घडली. याप्रकरणी कॅजीटन माईकल डिसोझा (20, रा. सुप्रीम आंगण सोसायटी, वाघोली) यांनी फिर्याद दिली आहे.
पोलिसांनी दिलेल्या माहितीनुसार, कॅजीटन यांचे वडील माईकल डिसोझा हे त्यांची चारचाकी घेऊन लोहगाव-वाघोली रोडने जात असताना पाठीमागून आलेल्या एका ट्रक चालकाने त्यांच्या गाडीसमोर अचानक ट्रक थांबवला. त्यानंतर ट्रक चालकाने खाली उतरला आणि माईकल डिसोझा यांना ‘तु माझ्या पुढे गेलासच कसा’ असे म्हणत लोखंडी रॉडने मारहाण करण्यास सुरूवात केली. या मारहाणीत माईकल डिसोझा हे गंभीर जखमी झाले आहेत . या प्रकरणाचा पुढील तपास सहायक पोलिस निरीक्षक चंदन हे करत आहेत.
