Dound : जमिनीच्या वादातून घरात घुसून कुटुंबीयांना बेदम मारहाण केल्याप्रकरणी सात जणांविरुद्ध दौंड पोलीस ठाण्यात गुन्हा दाखल करण्यात आला आहे. हिंगणीबेर्डी (ता. दौंड) ग्रामपंचायत हद्दीतील गट नं. 150 व 151 या जमिनीच्या वादातून 25 फेब्रुवारी 2026 ला दुपारी दोन वाजण्याच्या सुमारास हि घटना घडली.
माऊली बबन वाळके, बबन राऊ वाळके, सुदाम राऊ वाळके, परमेश्वर आप्पा वाळके, सिध्दी परमेश्वर वाळके, नंदाबाई बबन वाळके, मंदा परमेश्वर वाळके (सर्व रा. विठठल नगर, हिंगणीबेर्डी, ता. दौंड) अशी गुन्हा दाखल करण्यात आलेल्या सात जणांची नावे आहेत. याप्रकरणी बंकट दत्तू मचिंदर (वय-40, व्यवसाय शेती, रा. हिंगणीबेर्डी, ता. दौंड) यांनी दौंड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी व आरोपी यांच्यात गट नं. 150 व 151 यामधील जमिनीच्या रस्त्याच्या वादावरून तहसीलदार कार्यालयात प्रकरण सुरू आहे. 25 फेब्रुवारीला दुपारी सुमारे दोन वाजण्याच्या सुमारास नायब तहसीलदार यांनी संबंधित जमिनीवर स्पॉट पंचनामा केला होता. निकाल विरोधात जाईल या भीतीने रागाच्या भरात आरोपींनी फिर्यादींच्या नातेवाईकांच्या घरात घुसून मारहाण केल्याचे तक्रारीत नमूद आहे.
यावेळी उत्तम मचिंदर यांची पत्नी मिना उत्तम मचिंदर यांनी आरडाओरड केल्याने फिर्यादी बंकट मचिंदर आणि त्यांचा चुलत भाऊ अमोल उत्तम मचिंदर हे मदतीसाठी धावत आले. मात्र आरोपींनी त्यांनाही शिवीगाळ करत लाथाबुक्क्यांनी मारहाण केली तसेच जिवे मारण्याच्या धमक्या दिल्याचे फिर्यादीत नमूद आहे. जखमींनी उपचार घेतल्यानंतर पोलिसांकडे तक्रार दिली.
दरम्यान, या प्रकरणी सातही आरोपींविरुद्ध भारतीय न्याय संहिता (BNS) कलम 115(2), 189(2), 191(2), 190, 333, 352 व 351(2) अन्वये गुन्हा दाखल करण्यात आला असून पुढील तपास पोलीस हवालदार लोहार करीत आहेत.
