Crime News: सोलापूर : सोलापूर जिल्ह्यातील बार्शी तालुक्यात एक धक्कादायक आणि संतापजनक घटना उघडकीस आली आहे. बार्शीच्या उक्कडगाव येथील एका महाविद्यालयात 11 वीमध्ये शिकणाऱ्या विद्यार्थ्याला त्याच महाविद्यालयातील काही सीनियर विद्यार्थ्यांनी खोलीत कोंडून अमानुष मारहाण केल्याचा प्रकार समोर आला आहे. या मारहाणीत विद्यार्थ्याचा एक कान निकामी झाला असून त्याची प्रकृती गंभीर असल्याची माहिती आहे. Crime News
मिळालेल्या माहितीनुसार, प्रसिक बनसोडे असे पीडित विद्यार्थ्याचे नाव आहे. प्रसिक हा उक्कडगाव येथील महाविद्यालयात 11 वीमध्ये शिक्षण घेत आहे. गुरुवारी रात्री महाविद्यालयातील चार सीनियर विद्यार्थी त्याच्या खोलीत घुसले. त्यांनी प्रसिकला खोली साफ करण्यास आणि झाडू मारण्यास सांगितले. मात्र प्रसिकने ही कामे करण्यास नकार दिला. याच कारणावरून आरोपी विद्यार्थ्यांनी त्याच्यावर मारहाण सुरू केली.
पीडित प्रसिकने दिलेल्या माहितीनुसार, आरोपींनी त्याला सुमारे 3 तास खोलीत डांबून ठेवले होते. या काळात क्रिकेटच्या स्टम्पने त्याच्या शरीरावर ठिकठिकाणी जबर मारहाण करण्यात आली. ही मारहाण इतकी भीषण होती की प्रसिकचा एक कान कायमचा निकामी झाला असून सध्या त्याला एका कानाने ऐकू येत नाही. मारहाण करत असताना आरोपी विद्यार्थ्यांनी मद्यप्राशन केले होते, असा आरोपही प्रसिकने केला आहे.
या गंभीर घटनेनंतरही महाविद्यालय प्रशासनाने अद्याप पोलिसांत कोणतीही तक्रार दाखल केलेली नाही. उलट, प्रशासन दोषी विद्यार्थ्यांना पाठीशी घालत असल्याचा आरोप पीडित विद्यार्थी आणि त्याच्या कुटुंबीयांनी केला आहे. यामुळे पालक वर्गात तीव्र संताप व्यक्त केला जात आहे.
मारहाण झालेल्या प्रसिकला उपचारासाठी धाराशिव येथील शासकीय रुग्णालयात दाखल करण्यात आले आहे. त्याची प्रकृती सध्या गंभीर असून डॉक्टरांच्या देखरेखीखाली उपचार सुरू आहेत. या घटनेची सखोल चौकशी करून दोषींवर कठोर कारवाई करण्यात यावी, अशी मागणी प्रसिकच्या कुटुंबीयांनी केली आहे.
