पुणे : पुण्यात महापालिकेच्या कचर्याच्या डंपरखाली सापडल्याने एका महाविद्यालयीन तरुणीचा जागीच मृत्यू झाला आहे. ही घटना मंगळवारी (दि.२७मे) दुपारी ०१:३० वाजण्याच्या सुमारास कॉमर झोनकडे जाणार्या रस्त्यावर छत्रपती शाहू महाराज चौक परिसरात घडली. एकता भरत पटेल (वय २३ वर्ष, रा. विद्यानगर, पिंपळे गुरव) असे मृत्यू झालेल्या तरुणीचे नाव आहे. याप्रकरणी, डंपरचालक त्रंबक शेरखाने याला (वय.३८ वर्ष, रा. औंध कॅम्प) विश्रांतवाडी पोलिसांनी ताब्यात घेतले आहे. त्याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, एकता ही मराठवाडा मित्रमंडळ लोहगाव येथे अभियांत्रिकीचे शिक्षण घेत होती. आज मंगळवारी दुपारी (दि.२७मे) ती मोपेड दुचाकीवरून कॉमर झोनकडे जाणार्या रोडने जात होती. तेंव्हा छत्रपती शाहू महाराज चौकासमोरील बाजूस डंपरचा आणि तिच्या मोपेड दुचाकीचा अपघात झाला.
या अपघातात ती रस्त्यावर कोसळली. तेंव्हा डंपरचे पाठीमागील चाक तिच्या डोक्यावरून गेल्याने तिचा जागीच मृत्यू झाला. त्यानंतर शवविच्छेदनासाठी तिचा मृतदेह ससून रुग्णालयात पाठविण्यात आला होता. एकताच्या निधनामुळे तिच्या कुटुंबियांना व मित्र परिवारावर शोककळा पसरली आहे.
