पुणे : वसतीगृहात राहणाऱ्या एका २० वर्षीय तरुणीला हिंदी मालिका व चित्रपटांमध्ये काम करण्याची व ऑडिशन देण्यासाठी अशी विविध कारणे सांगून सायबर चोरट्यांनी तब्बल ७१ हजार रुपयांना गंडा घातल्याचा प्रकार समोर आला आहे.
याप्रकरणी २० वर्षाच्या तरुणीने येरवडा पोलीस ठाण्यात फिर्याद दिली आहे. त्यानुसार पोलिसांनी तरुण चंद्रशेखर शर्मा (रा. चंदीगड), आशासिंग, क्रिशन चांद (रा. पंजाब) यांच्यावर गुन्हा दाखल केला आहे.
मिळालेल्या माहितीनुसार, फिर्यादी ही एका वसतीगृहात राहते. तिने फेसबुकवर हिंदी मालिका व चित्रपटात काम करण्यासंबंधीची जाहिरात पाहिली. त्यावर ऑडिशनसाठी संपर्क देण्यात आला होता. त्यानुसार, तिने संपर्क साधला असता तिला वेगवेगळी कारणे सांगून ७१ हजार ८४९ रुपये जमा करण्यास सांगितले.
पैसे दिल्यानंतरही कोणतीही ऑडिशन झाली नाही. त्याबाबत विचारणा केल्यावर त्यांनी उडवाउडवीची उत्तरे दिली. त्यावेळी आपली फसवणूक झाल्याचे तरुणीच्या लक्षात आले. पोलीस निरीक्षक उत्तम चक्रे तपास करीत आहेत.
