उरुळी कांचन, (पुणे) : गावाच्या विकासासाठी कचरा व्यवस्थापन संदर्भात एकत्रित काम करू त्यासाठी लागणारी आवश्यक साधनसामग्री उरुळी कांचन (ता. हवेली) येथील ग्रामस्वच्छता अभियान ग्रुपला लवकरच उपलब्ध करून दिली जाईल. असे प्रतिपादन जिल्हा परिषदेचे मुख्य कार्यकारी अधिकारी रमेश चव्हाण यांनी केले.
उरुळी कांचन (ता. हवेली) येथील ‘ड्रीम्स युवा सोशल फाऊंडेशन’ संचलित उरुळी कांचन ग्रामस्वच्छता अभियान ग्रुपचा ९ वा वर्धापन दिन साजरा करण्यात आला. या दिनानिमित्त रविवारी (ता. ०७) लोणी काळभोर येथील विश्वराज हॉस्पिटलच्या दर्पण व ससून ब्लड बँकेची रक्तपेढी यांच्या संयुक्त विद्यमाने उरुळी कांचन (ता. हवेली) ग्रामपंचायत हद्दीतील बी.जी. शिर्के बाल विकास मंदिर या ठिकाणी रक्तदान शिबिराचे आयोजन करण्यात आले होते. यावेळी रमेश चव्हाण बोलत होते.
या रक्तदान शिबिरात ८६५ रक्तदात्यांनी सहभाग नोंदवला. यात ८३९ पुरुष व २६ महिलांचा समावेश होता. प्रत्येक रक्तदात्यास पर्यावरण पूरक तुळशीचे रोप, प्रशस्तीपत्र व भेट वस्तू देऊन सन्मानित करण्यात आले.
यावेळी हवेलीचे ज्येष्ठ नेते के. डी. बापू कांचन, माजी जिल्हा परिषद सदस्य महादेव कांचन, उरुळी कांचनचे सरपंच भाऊसाहेब कांचन, माजी सरपंच संतोष कांचन, पुणे जिल्हा नियोजन समितीचे माजी सदस्य संतोष कांचन, क्षेत्रीय रेल्वे समितीचे सदस्य अजिंक्य कांचन, हवेली कृषी उत्पन्न बाजार समितीचे संचालक राजाराम कांचन, रामभाऊ तुपे, उरुळी कांचन ग्रामस्वच्छता अभियान ग्रुपचे संतोष चौधरी, शांताराम चौधरी, किरण वांजे, शैलेश गायकवाड, शैलेश बाबर, शिवाजी नवगिरे, रमेश महाडिक, सोमनाथ बगाडे आदि मान्यवरांसह पदाधिकारी व कार्यकर्ते मोठ्या प्रमाणात उपस्थित होते.
यापुढे बोलताना रमेश चव्हाण म्हणाले, “मागील काही वर्षातील कार्य पाहता उरुळी कांचन व परिसरातील विकासाला वेगळी दिशा देण्याचे काम या ग्रुपकडून केले जात आहे. लोकसहभागातून ग्रामविकास कशा पद्धतीने घडू शकतो याचे उत्तम उदाहरण म्हणजे ग्रामस्वच्छता अभियान ग्रुप आहे.
दरम्यान, मागील ९ वर्षापासून हा ग्रुप उरुळी कांचनसह परिसरात संतोष चौधरी यांच्या नेतृत्वाखाली सर्व सहकाऱ्यांच्या सहभागाने ग्राम स्वच्छता अभियान, रक्तदान शिबीर, हजारो झाडे लावून संवर्धन करण्याचे काम पर्यावरणाचा ऱ्हास थांबविण्याचे कार्य जोमाने करीत आहे. संत तुकाराम महाराज पालखी सोहळ्यादरम्यान संपूर्ण परिसर व पालखी मार्ग स्वच्छता मोहीम राबवून एक वेगळा आदर्श निर्माण केला आहे.
