लोणी काळभोर: येथील रेनबो इंटरनॅशनल स्कूलमध्ये 79 वा स्वातंत्र्यदिन मोठ्या उत्साहात साजरा झाला. अंजीर संशोधन परिषदेचे अध्यक्ष आप्पासाहेब काळभोर, तसेच सामाजिक कार्यकर्ते रमेश मेमाणे यांच्या हस्ते ध्वजारोहण करण्यात आले.
कार्यक्रमात इयत्ता 5 वीच्या विद्यार्थ्यांनी स्वागतगीत सादर केले, तर 4 थीच्या विद्यार्थ्यांनी “ए मेरे वतन के लोगो” हे देशभक्तीपर गीत सादर करून वातावरण भारावून टाकले. इयत्ता 8 वीची तनिष्का जगताप हिने “तेरी मिट्टी…” या गाण्याने सर्वांची मने जिंकली. क्रीडाशिक्षक निखिल जाधव यांच्या मार्गदर्शनाखाली व प्रांजल काळभोरच्या नेतृत्वाखाली आर.एस.पी. ग्रुपने भव्य परेड सादर केली. दुर्गा लक्ष्मीच्या अश्वावर इयत्ता 7 वीची सृष्टी पायघन हिने स्वार होऊन परेड आकर्षण ठरली. इयत्ता 8 वीची विद्यार्थिनी तनिष्का जगताप या विद्यार्थिनीने “तेरी मिट्टी…” देशभक्तीपर गाण्यावर सुरेख आवाजात गाणे सादर करून सर्वांची मने जिंकली.
शाळेचे नृत्य शिक्षक अश्विन मनगुतकर यांच्या मार्गदर्शनाखाली ‘ तिरंगा’ या गाण्यावर इयत्ता 6 वीच्या विद्यार्थ्यांनी आपली जन्मदाती आई व भूमीबद्दलची आस्था व निष्ठा नृत्या मधून सादर केली. चिमुकल्या विद्यार्थ्यांनी आत्मविश्वासाने स्वातंत्र्यदिनाविषयी भाषणे केली. नृत्य व संगीताबरोबरच कराटे प्रशिक्षक प्रफुल्ल गायकवाड यांनी कराटे व स्वसंरक्षणाची प्रात्यक्षिके सादर केली, तर दीपक शितोळे यांनी आकर्षक फलक लेखनाने लक्ष वेधले.
प्रमुख पाहुणे अप्पासाहेब काळभोर यांनी कृषी क्षेत्रातील यशस्वीतेची गाथा स्वातंत्र्यदिनानिमित्त सर्वांना सांगितली. तसेच इस्राइल या शेती विषयक आधुनिक तंत्रज्ञानाचा अभ्यास करून या तंत्रज्ञानाच्या वापराने आळंदी म्हातोबा येथील खडक डोंगरावर फळबागेचे नंदनवन फुलवले असल्याची माहिती दिली. संपूर्णतः सेंद्रिय पद्धतीने फुलवलेल्या आपल्या शेतीला भेट देण्यासाठी त्यांनी विद्यार्थी व पालकांना आमंत्रित केले.
दरम्यान, यावेळी रेनबो इंटरनॅशनल स्कूलचे चेअरमन नितीन काळभोर, स्कूलच्या सेक्रेटरी मंदाकिनी काळभोर, रेनबो स्कूलच्या प्राचार्या मीनल बंडगर, उपप्राचार्या प्रशांत लाव्हरे, सुपरवायझर पायल बोळे, रेनबो किड्स कायझन स्कूलच्या प्राचार्या ऐश्वर्या काळभोर, प्रथमेश काळभोर, रामदास काळभोर यांची प्रमुख उपस्थिती होती. कार्यक्रमाचे सूत्रसंचालन भाग्यश्री सुरवसे व पार्थ सुभेदार यांनी केले तर आभार प्रदर्शन उदय कदम यांनी केले. या सोहळ्यास मोठ्या संख्येने पालक व विद्यार्थी उपस्थित राहून स्वातंत्र्य दिनाचा उत्सव साजरा केला.
