संदीप टूले
केडगाव, ता.२९: माझा राष्ट्रीय समाज पक्ष स्वतंत्र असून, मी कोणत्याही पक्षाची मदत न घेता, युती न करता लोकसभेसह महाराष्ट्रातील सर्व विधानसभेच्या जागा पूर्ण ताकदीने लढवणार आणि ती जिंकून आणणार असा विश्वास राष्ट्रीय समाज पक्षाचे संस्थापक, राष्ट्रीय अध्यक्ष आणि माजी मंत्री महादेव जानकर यांनी दौंडमध्ये व्यक्त केला.
राष्ट्रीय समाज पक्षाच्या वर्धापन दिनानिमित्त पक्षाची जनस्वराज यात्रेला पंढरपूरवरुन सुरुवात करण्यात आली. पक्षाचे संस्थापक अध्यक्ष महादेव जानकर हे या यात्रेत सहभागी आहेत. गेल्या दीड महिन्यापूर्वी सुरू झालेली ही जनस्वराज यात्रा बारामती लोकसभा मतदारसंघात सोमवारी (दि .२८) पोहोचली. त्यानंतर दौंड तालुक्यात ठिकठिकाणी कार्यकर्त्यांनी व पदाधिकाऱ्यांनी या जनस्वराज यात्रेचे स्वागत केले.
दौंड येथे पत्रकारांशी बोलताना महादेव जानकर म्हणाले की, सध्या जनतेचे राज्य नसून जनतेचे राज्य आणण्यासाठी ही स्वराज्य यात्रा सुरू केली आहे. शेतकऱ्यांचे प्रश्न, बेरोजगारी, महिलांच्या समस्या काय आहे हे जाणून घेत आहे. सध्या दुष्काळाची अवस्था निर्माण झाली आहे. ती सोडवण्यासाठी आणि रयतेचे राज्य यावं यासाठी ही यात्रा काढली आहे.
देशातील आगामी लोकसभेच्या ५४३ जागा लढवणार आहे. त्यात बारामती, माढा, परभणी यासह लोकसभा मतदारसंघाची तयारी चालू आहे. बारामती लोकसभा लढवण्याची माझी इच्छा आहे पण पक्षाने मला या जागेवर उमेवारी दिली, तर उभा राहील, अशी मिश्किल टिप्पणी त्यांनी केली.
दौंडचे स्थान माझ्या हृदयाप्रमाणे; जनतेने मला मोठी मदत केली
अगोदर लोकसभेचे रणांगण करणार असून, लोकसभेला दिल्लीला जाणार आणि विधानसभा लढविणार. दौंडचे स्थान हे माझ्या हृदयाप्रमाणे येथील जनतेने मला मोठी मदत केली आहे. त्यामुळे दौंडच्या तमाम जनतेचा मी ऋणी आहे. दौंड विधानसभेच्या निवडणुकीत राष्ट्रीय समाज पक्षाचा उमेदवार उभा करणार आणि जिंकणारही, असा विश्वास महादेव जानकर यांनी यावेळी बोलताना व्यक्त केला. यावेळी या जनस्वराज्य यात्रेमध्ये दौंड तालुक्यातील असंख्य कार्यकर्ते सहभागी झाले होते.
