नागपूर: इतिहास काढून पाहिला तर मराठा आरक्षणाला सर्वाधिक विरोध शरद पवारांनी केला असल्याचं देवेंद्र फडणवीस म्हणाले आहेत. त्याशिवाय उद्धव ठाकरे यांच्यावर निशाणा साधला आहे. नागपुरात भाजपाद्वारे पदाधिकाऱ्यांची बैठक बोलावण्यात आली आहे. यावेळी देवेंद्र फडणवीस यांनी पदाधिकाऱ्यांना संबोधित करताना विरोधकांना लक्ष्य केलं.
महाविकास आघाडीचं सरकार असताना सुप्रिया सुळे मराठा आरक्षणाशिवाय इतर महत्त्वाचे प्रश्न नाहीत का असं सांगत निघून गेल्या होत्या. ज्यांना वारंवार संधी मिळाली त्यांच्या मनात असतं तर मंडळ आयोग लागू झाला तेव्हा आऱक्षण देता आलं असतं. कोण कोणत्या यादीत आहे हेदेखील पाहिलं नाही,” अशी टीका देवेंद्र फडणवीसांनी केली. “त्यांना आरक्षण द्यायचंच नव्हतं. त्यांना समाजांना झुंजवत ठेवण्यात जास्त रस आहे. त्यांचं राजकारण म्हणजे लोक झुंजत राहिले तर आपल्याकडे नेतेपद येईल,” असा गंभीर आरोप देवेंद्र फडणवीस यांनी केला.
विरोधक रोज आपल्या भूमिका बदलत आहेत. उद्धव ठाकरेंची सेना आणि शरद पवारांची राष्ट्रवादी, काँग्रेस ज्या प्रकारच्या भूमिका घेत आहेत, त्यांना केवळ सत्तेच्या राजकारणात आपलं अस्तित्व टिकवायचं आहे. यामुळे येणारे दिवस अधिक सावधानतेने काढावे लागणार आहेत,” असा इशाराही देवेंद्र फडणवीस यांनी दिला आहे.
“महाराष्ट्रात आपलं सरकार असताना मराठा समाजाला आरक्षण दिलं. फक्त दिलं नाही तर त्याचवेळी हायकोर्टात ते टिकवून दाखवलं. सर्वोच्च न्यायालयात आपण असेपर्यंत ते टिकलं. आपलं सरकार गेल्यानंतर त्यावर स्थगिती आली. त्यामुळे आपली वचनबद्धता पक्की आहे. मुख्यमत्र्यांच्या नेतृत्वात आपण मराठा समाजाला आरक्षण देण्यासाठी यशस्वी प्रयत्न करणार आहोत. पण कोणत्याही प्रकारे ओबीसी समाजावर अन्याय होऊ देणार नाही,” असा पुनरुच्चार त्यांनी केला.
