पुणे: राज्यात सध्या (Mayor Salary) महापालिका निवडणुकांचे वारे वाहत असून, ‘महापौर’ कोण होणार याची चर्चा रंगली आहे. पण आपल्या शहराचा ‘प्रथम नागरिक’ म्हटल्या जाणाऱ्या महापौराकडे नेमकी किती ताकद असते? त्यांना पगार किती मिळतो? की हे पद फक्त शोभेचे आहे? या प्रश्नांची उत्तरे जाणून घेणे प्रत्येक सुजाण नागरिकासाठी महत्त्वाचे आहे.
महापौर हा महापालिकेचा राजकीय प्रमुख असतो. साध्या भाषेत सांगायचे तर, तो महापालिका आयुक्त (IAS अधिकारी) आणि जनता यांच्यातील महत्त्वाचा दुवा असतो. आयुक्तांकडे जरी प्रशासकीय निर्णय घेण्याची आणि बजेट ठरवण्याची ‘एक्झिक्युटिव्ह’ पावर असली, तरी शहराचे प्रश्न प्रशासनापर्यंत पोहोचवण्याचे काम महापौर करतात.
महापौरांना अधिकाऱ्यांच्या बदल्या किंवा थेट बजेट मंजूर करण्याचे अधिकार नसतात. मात्र, महापालिकेच्या ‘सर्वसाधारण सभेचे’ ते अध्यक्ष असतात. शहराच्या विकासाचा कोणताही ठराव महापौरांच्या सहीशिवाय पूर्ण होऊ शकत नाही. विकासकामासाठी प्रशासनाला जाब विचारणारा महापौर असतो.
महापौरांना पगार किती मिळतो?
अनेकांना वाटतं की, महापौरांना लाखांमध्ये पगार असेल, पण वस्तुस्थिती वेगळी आहे. महापौरांना मिळणारी रक्कम ही ‘वेतन’ नसून ते ‘मानधन’ असते. महापालिकेच्या श्रेणीनुसार (A, B, C, D) हे मानधन बदलते.
-
मुंबई: देशातील श्रीमंत महापालिका असूनही येथील महापौरांना महिन्याला सुमारे ५४,००० रुपये मिळतात.
-
पुणे: येथील महापौरांचे मानधन महिन्याला अंदाजे ५१,००० रुपये आहे.
-
नागपूर: येथे मानधन साधारण ४२,००० रुपये इतके असते.
मात्र, मानधनापेक्षाही त्यांना अधिकृत बंगला, वाहन, ड्रायव्हर आणि विशेष भत्ते महापौरांना दिले जातात.
