तेहरान: शनिवारी मध्यरात्री इस्रायली हवाई (Israel Iran War) दलाने (IDF) अमेरिकेच्या पाठिंब्याने इराणची राजधानी तेहरानमधील प्रमुख तेल डेपो आणि रिफायनिंग सुविधांना लक्ष्य केले. या हल्ल्यांमुळे तेहरानचे आकाश आगीच्या ज्वाळांनी आणि धुराच्या लोटांनी काळवंडले होते, या घटनेचे पडसाद आता जागतिक राजकारण आणि अर्थव्यवस्थेवर उमटण्याची दाट शक्यता आहे.
इस्रायली संरक्षण दलाने (IDF) स्पष्ट केले आहे की, हा हल्ला केवळ इंधनावर नसून इराणच्या लष्करी ताकदीवर आहे. तेहरानमधील ‘शाहरान’ तेल डेपोचा वापर इराणची ‘दहशतवादी राजवट’ त्यांच्या लष्करी हालचाली आणि क्षेपणास्त्र यंत्रणांना ऊर्जा देण्यासाठी करत होती. इराणची लष्करी यंत्रणा खिळखिळी करणे, हाच या हल्ल्यामागचा मुख्य हेतू असल्याचे इस्रायलने म्हटले आहे.
अमेरिकेचे राष्ट्राध्यक्ष डोनाल्ड ट्रम्प यांनी या कारवाईचे समर्थन करताना इराणला कडक शब्दांत तंबी दिली आहे. “इराणने आपल्या कारवाया न थांबवल्यास हल्ल्यांची तीव्रता कित्येक पटीने वाढवली जाईल,” असा इशारा ट्रम्प यांनी दिला आहे. दुसरीकडे, इराणचे वरिष्ठ नेते अली लारीजानी यांनी “या युद्धाची मोठी किंमत अमेरिकेला मोजावी लागेल,” असे म्हणत प्रत्युत्तराचे संकेत दिले आहेत.
