पंजाब: पंजाब पोलिसांनी पाकिस्तान सीमेलगतच्या तरनतारण जिल्ह्यातून लष्कराच्या हालचालीशी संबंधित संवेदनशील माहिती पाकिस्तानी गुप्तचर अधिकाऱ्याला शेअर केल्यामुळे एकाला अटक करण्यात आली आहे. गगनदीप सिंग ऊर्फ गगन तरनतार, गली नजर सिंग वाली, मोहल्ला रोडुपूर) असे आरोपीचे नाव आहे. पोलिसांनी या व्यक्तीकडून एक मोबाईल फोन जप्त केला आहे. यामध्ये पाकिस्तानी गुप्तचर अधिकाऱ्याशी माहिती शेअर केल्याची माहिती समोर आली आहे.
पोलिसांनी दिलेल्या माहितीनुसार, आरोपी ‘आयएसआय’च्या संपर्कात होता आणि त्याने संवेदनशील माहितीच्या बदल्यात पैसे घेतल्याचे आढळून आले. गगनदीप सिंग ऊर्फ गगन तरनतार, गली नजर सिंग वाली, मोहल्ला रोडुपूर) असे आरोपीचे नाव आहे. याप्रकरणी त्याला अटक करण्यात आली. तरनतारण पोलिस आणि पोलिसांच्या काउंटर इंटेलिजन्स विंगने संयुक्तपणे ही कारवाई केली.
आरोपी खलिस्तानी समर्थक गोपाल सिंग चावलाच्या संपर्कात
‘पीटीआय’च्या वृत्तानुसार, आरोपीने लष्कराची तैनाती आणि महत्त्वाच्या ठिकाणांसह गुप्त माहिती शेअर करून राष्ट्रीय सुरक्षेला धोका निर्माण केला होता. डीजीपी गौरव यादव यांनी सांगितले की गगनदीप गेली ५ वर्षे खलिस्तानी समर्थक गोपाल सिंग चावला याच्या संपर्कात होता. चावलाच्या माध्यमातूनच त्याचा ‘पाकिस्तान इंटेलिजन्स ऑपरेटिव्ह सिस्टिम’ शी संपर्क झाला होता.
मोबाईलमध्ये २० हून अधिक संपर्क…
डीजीपी यादव म्हणाले की, गगनदीपला ‘पाकिस्तान इंटेलिजन्स ऑपरेटिव्ह सिस्टिम’ कडून भारतीय चॅनेल्समार्फत पैसे मिळाले होते. पोलिसांनी जप्त केलेल्या मोबाईल फोनमध्ये २० हून अधिक आयएसआय संपर्कांची माहिती आढळून आली आहे. तसेच गुप्तहेरगिरीच्या या नेटवर्कमधील इतर संबंधांचा तपास करण्यासाठी आर्थिक व तांत्रिक चौकशी सुरू आहे. या प्रकरणी तरनतारण पोलिस ठाण्यात अधिकृत गोपनीयता कायद्यान्वये गुन्हा दाखल करण्यात आला असून पुढील तपास सुरू आहे.
